Këngëtarja me famë botërore dhe me origjinë shqiptare, Dua Lipa, ka komentuar për herë të parë zhvillimet e fundit politike në Shqipëri, duke shprehur shqetësimin e saj për mungesën e konsultimit publik në vendimmarrje.
Në një podcast me shkrimtaren shqiptare Lea Ypi, i cili pritet të publikohet i plotë gjatë javës, artistja u ndal te situata aktuale në Shqipëri dhe protestat që kanë përfshirë vendin.
“Nuk mund të flasim për historinë e Shqipërisë pa folur për Shqipërinë e sotme. Më duket shqetësuese që qeveria mund të ndryshojë ligjin për mjedisin pa një konsultim publik”, u shpreh Dua Lipa në një fragment të publikuar nga intervista.
Sipas prezantimit të episodit, biseda mes Dua Lipës dhe Lea Ypit nuk fokusohet vetëm te kujtimet e autores për periudhën pas rënies së komunizmit, por trajton edhe kuptimin e lirisë, ndryshimet politike dhe zhvillimet e fundit në Shqipëri.
Në përshkrimin e podcastit thuhet se të dyja diskutojnë mbi realitetin e ndryshimeve politike dhe frymëzimin që marrin nga protestat që po zhvillohen në vend.
Deklarata e këngëtares shqiptare me famë botërore vjen në një kohë kur protestat në Tiranë dhe qytete të tjera kanë vijuar prej më shumë se 40 ditësh.
Demonstratat nisën pas kundërshtimeve ndaj ndryshimeve ligjore që prekin zonat e mbrojtura dhe janë shoqëruar me kërkesa të tjera politike, përfshirë dorëheqjen e qeverisë dhe krijimin e një qeverie teknike.
Ky është reagimi i parë publik i Dua Lipës lidhur me situatën politike dhe protestat që po zhvillohen në Shqipëri.
Discussion about this post