Është ndarë nga jeta në moshën 78-vjeçare aktori i njohur i humorit dhe teatrit, Todi Llupi, një prej figurave më të spikatura të Estradës Profesioniste të Fierit dhe Teatrit “Bylis”.
Lajmi u bë i ditur nga Drejtoria e Artit, Kulturës dhe Turizmit pranë Bashkisë Fier, e cila shprehu ngushëllimet për familjen, miqtë dhe komunitetin artistik.
I lindur në Fier më 1 mars 1948, Todi Llupi iu përkushtua skenës që prej vitit 1971 si aktor profesionist i Estradës së Fierit. Gjatë karrierës së tij interpretoi qindra role në komedi, skeçe, parodi, kuplete, monologë dhe pantomima, duke krijuar personazhe që mbetën të dashura për publikun.
Ai u dallua për stilin e tij të veçantë të interpretimit, frymën popullore dhe përdorimin mjeshtëror të dialektit myzeqar, ndërsa si kupletist dhe parodist u vlerësua edhe për zërin e tij karakteristik tenor.
Një nga interpretimet më të njohura të karrierës së tij mbetet parodia “Do martojmë Malon”, e realizuar në vitin 1982, e cila e bëri një nga artistët më të dashur të humorit shqiptar.
Për kontributin e tij në art dhe kulturë, Todi Llupi u nderua me titullin “Artist i Merituar” në vitin 1989. Në vitin 2021, Presidenti i Republikës e dekoroi me titullin e lartë “Mjeshtër i Madh”, në vlerësim të kontributit të tij të jashtëzakonshëm në artin skenik dhe humorin shqiptar.
Me ndarjen e tij nga jeta, Fieri dhe mbarë kultura shqiptare humbin një prej artistëve që për dekada solli buzëqeshje dhe emocion në skenë.
MESAZHI I PLOTË
Lamtumirë, Mjeshtër i Madh!
Me dhimbje të thellë morëm lajmin e ndarjes nga jeta të Todi Llupit, një prej figurave më të spikatura të Estradës Profesioniste të Fierit dhe Teatrit “Bylis”, artistit që për dekada i dhuroi publikut buzëqeshje, emocion dhe art të vërtetë.
I lindur në Fier më 1 mars 1948, Todi Llupi iu përkushtua skenës që prej vitit 1971, si aktor profesionist i Estradës së Fierit. Me talentin e tij të rrallë interpretoi qindra role në komedi, skeçe, parodi, kuplete, monologë, pantomima e dialogë, duke krijuar personazhe që mbetën të paharrueshëm në kujtesën e publikut.
Aktrimi i tij u dallua për frymën popullore, përdorimin mjeshtëror të dialektit myzeqar, si edhe për interpretimin plot jetë të karaktereve të njerëzve të thjeshtë. Si kupletist dhe parodist, ai spikati edhe për zërin e tij të bukur tenor, duke lënë gjurmë të pashlyeshme në historinë e humorit shqiptar.
Një nga interpretimet e tij më të njohura mbetet parodia “Do martojmë Malon” (1982), që e ktheu në një nga artistët më të dashur të skenës shqiptare.
Për kontributin e çmuar në art dhe kulturë, ai u nderua me titullin “Artist i Merituar” në vitin 1989, ndërsa më 10 prill 2021 u dekorua nga Presidenti i Republikës me titullin e lartë “Mjeshtër i Madh”, në vlerësim të kontributit të tij të jashtëzakonshëm në artin skenik dhe humorin shqiptar.
Sot, Fieri humbi një artist të madh, ndërsa kultura shqiptare humbi një nga zërat dhe figurat e saj më të dashura.
🕯️ Drejtoria e Artit, Kulturës dhe Turizmit, Bashkia Fier, i shpreh ngushëllimet më të sinqerta familjes Llupi, miqve, kolegëve dhe gjithë komunitetit artistik.
I përjetshëm qoftë kujtimi i Mjeshtrit të Madh, Todi Llupi.
Discussion about this post