Arrestohen dy policë të Komisariatit 3 në Tiranë, dyshohen për korrupsion pasiv dhe shpërdorim detyre

Dy efektivë të Komisariatit të Policisë Nr. 3 në Tiranë kanë rënë në prangat e Agjencisë së Mbikëqyrjes Policore (AMP), pasi dyshohen për korrupsion pasiv dhe shpërdorim detyre.

Në pranga janë vënë D. B., 25 vjeç, dhe E. K., 23 vjeç, të dy me gradën Inspektor dhe pjesë e Patrullës së Përgjithshme në Komisariatin Nr. 3.

Sipas AMP-së, hetimi nisi menjëherë pas publikimit të një videoje në rrjetin social ku shfaqeshin pamje që ngritën dyshime për sjelljen e efektivëve.

Pas verifikimeve të kryera nga strukturat hetimore dhe në bashkëpunim me Prokurorinë kompetente, u bë arrestimi në flagrancë i dy policëve.

Ata dyshohen se kanë kryer veprat penale ‘Korrupsioni pasiv i personave që ushtrojnë funksione publike’ dhe ‘Shpërdorimi i detyrës’, të kryera në bashkëpunim.

Njoftimi i AMP:

AMP arreston në flagrancë dy punonjës policie të Komisariatit Nr. 3, Tiranë, për korrupsion pasiv dhe shpërdorim detyre

Drejtoria Rajonale Tiranë, në vijim të veprimeve hetimore të kryera nën drejtimin e Prokurorisë kompetente, ka arrestuar në flagrancë dy punonjës të Policisë së Shtetit të dyshuar se kanë konsumuar elementët e veprave penale ‘Korrupsioni pasiv i personave që ushtrojnë funksione publike’ dhe ‘Shpërdorimi i detyrës’, të kryera në bashkëpunim, të parashikuara nga nenet 259, 248 dhe 25 të Kodit Penal.

– D. B, 25 vjeç, me gradën Inspektor, me detyrë trupë shërbimi në Patrullën e Përgjithshme pranë Komisariatit të Policisë Nr. 3, Tiranë;

– E. K, 23 vjeç, me gradën Inspektor, me detyrë trupë shërbimi në Patrullën e Përgjithshme pranë Komisariatit të Policisë Nr. 3, Tiranë.

Hetimi ka nisur menjëherë pas publikimit, më datë 16.07.2026, të pamjeve filmike në rrjetin social ‘Jeta është Qef’, të cilat u analizuan dhe u verifikuan në mënyrë të plotë nga strukturat hetimore të AMP-së.

Vijojnë veprimet hetimore për identifikimin dhe dokumentimin e përgjegjësisë penale të personave të tjerë të implikuar në këtë ngjarje, në funksion të veprave penale të parashikuara nga nenet 244 dhe 301 të Kodit Penal.

Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Tiranë.

Agjencia e Mbikëqyrjes Policore mbetet plotësisht e angazhuar në luftën kundër korrupsionit, abuzimit me detyrën dhe çdo forme tjetër paligjshmërie nga punonjësit e Policisë së Shtetit.

Falënderojmë qytetarët dhe median për kontributin e tyre në denoncimin e rasteve të shkeljes së ligjit.