Vala e të nxehtit ekstrem që ka përfshirë mbarë Europën, nga rajoni i Mesdheut e deri në vendet e Europës Veriore si Gjermania, po sjell pasoja të rënda për shëndetin e qytetarëve.
Në një intervistë për News24, mjekja shqiptare në Gjermani, Dr. Aurora Dollenberg, ka dhënë një alarm mbi situatën klinike, duke zbuluar se temperaturat që po shënojnë mbi 40 gradë në diell kanë shkaktuar një rritje drastike të urgjencave, të shtrimeve në spital dhe për fat të keq, edhe të mortalitetit.
Dr. Dollenberg shpjegoi se vendet veriore po përballen edhe me një krizë kryesore infrastrukture, pasi shtëpitë dhe institucionet janë të ndërtuara për të ngrohur gjatë dimrit të gjatë dhe nuk kanë sisteme efikase ftohjeje për të përballuar javë të tëra me vapë përvëluese.
Pse truri është i pari që “dështon” nga i nxehti?
Mjekja bëri një analogji mes trupit të njeriut dhe një biomakinerie që mbinxehet. Kur temperaturat e jashtme kalojnë 40 gradë, krijohet një diferencë e madhe me temperaturën normale të trupit, e cila është 37 gradë. Për të ulur këtë mbinxehje, organizmi aktivizon djersitjen e trefishuar. Si pasojë, i gjithë gjaku braktis organet vitale dhe shkon drejt lëkurës. Duke qenë se truri merr më pak gjak dhe oksigjen, ai është i pari që stopon së funksionuari mirë.
Kjo situatë shkakton simptomat e para si dhimbje të forta koke, marrje mendsh, irritim, konfuzion mental dhe disorientim. Po ashtu, shfaqen të vjella dhe nauze, të cilat janë simptoma direkte që tregojnë rënie të tensionit në tru. Më pas vjen dështimi i zemrës, që mund të shkaktojë insuficiencë kardiake, dhe i veshkave, gjë që shpjegon se pse gjatë verës njerëzit shkojnë më rrallë në tualet, pasi të gjitha lëngjet eliminohen nëpërmjet lëkurës.
Kujdes me fëmijët dhe të moshuarit
Grupmoshat më të rrezikuara që dehidratohen në kohë rekord janë fëmijët dhe të moshuarit mbi 65 vjeç, duke bërë që urgjencat kryesore në verë të jenë pediatrike dhe geriatrike.
Tek fëmijët, duke qenë se nuk i verbalizojnë dot simptomat, prindërit duhet të kenë kujdes nëse fëmija bëhet apatik, luan më pak, ka këputje trupore, i zë gjumi më shumë se zakonisht ose ka lëkurë komplet të thatë. Humbja e vetëdijes ose kolapsi janë shenjat e fundit të alarmit për goditjen nga nxehtësia.
Një nga këshillat më të rëndësishme të Dr. Dollenberg shkoi për të moshuarit që vuajnë nga hipertensioni. Ajo tërhoqi vëmendjen se medikamentet e tensionit apo të sheqerit nuk mund të merren me të njëjtën dozë gjatë ditëve me vapë ekstreme. Për shkak të djersitjes, tensioni i trupit ulet vetvetiu. Nëse pacienti merr përsëri ilaçet e rritjes së tensionit, vlerat e tij mund të pësojnë rënie drastike, duke e çuar pacientin në gjendje të fikti dhe pavetëdije.
“Ne u këshillojmë pacientëve që në ditët me temperatura kaq ekstreme, nëse tensioni i tyre zbret poshtë vlerës 12, të bëjnë pauzë për disa ditë apo javë me këto medikamente. Ilaçet duhet të rimirren vetëm në momentin kur vlerat e tensionit fillojnë të ngrihen sërish mbi 14”, deklaroi Dr. Aurora Dollenberg.
Discussion about this post