Shqipëria pritet të përballet të premten me stuhi të shkurtra, por me intensitet të lartë, të shoqëruara me reshje të dendura shiu dhe erëra të forta. Paralajmërimi është bërë nga meteorologia Tanja Porja, e cila tha se fenomenet atmosferike mund të prekin pothuajse të gjithë territorin e vendit.
Sipas saj, bëhet fjalë për celula stuhish që zhvillohen në mënyrë të lokalizuar, ndaj është e vështirë të parashikohet me saktësi se cilat zona do të goditen më fort. Megjithatë, rreziku konsiderohet i lartë në zonat qendrore dhe juglindore të vendit.
Ndër qarqet dhe qytetet që mund të përjetojnë aktivitetin më intensiv atmosferik përmenden Tirana, Durrësi, Fushë-Kruja, Elbasani, Librazhdi, Pogradeci, Korça, Erseka, Devolli, si edhe Përmeti e Gjirokastra.
Porja sqaroi se, megjithëse stuhitë do të zgjasin pak, zakonisht nga 20 deri në 40 minuta, ato mund të sjellin sasi të mëdha reshjesh në një kohë shumë të shkurtër, si dhe erëra me shpejtësi të lartë.
Meteorologia shtoi se edhe gjatë ditës së enjte mund të ketë episode të izoluara reshjesh, por fenomenet më të forta pritet të regjistrohen gjatë së premtes.
Discussion about this post