Qytetarët pjesëmarrës në protestën e sotme, gjatë marshimit drejt kryeministrisë kanë shprehur pakënaqësitë e tyre përmes thirrjeve kundër kryeministrit Edi Rama.
Aktivisti Arben Kola ka deklaruar se pjesë e protestës së sotme janë edhe qytetarë nga diaspora, të cilët kanë ardhur nga jashtë vendit me qëllim kundërshtimin e qeverisë së Edi Ramës.
Ai akuzoi qeverinë për keqmenaxhim dhe deklaroi se vendi nuk ka rrugë tjetër përveç ndryshimit të klasës politike.
“Edhe sot kemi një pjesë të diasporës. Mërgata vjen për të rrëzuar Edi Ramën dhe qeverinë e tij. Ata kanë ardhur nga jashtë për një qëllim, rrëzimin e Edi Ramës.
Me këtë qeveri që ka shitur Shqipërinë nuk kemi rrugë tjetër deri në rrëzimin e kësaj qeverie dhe shporrjen e kësaj kaste politike”, tha Kola.
Ndër sloganet e dëgjuara nga turma ishin “Edi Rama dil në bulevard, atdheu është i yni, jo biznes privat!”, “Dorëheqje!”, “O tradhtar, jep dorëheqjen!”
“Ramoviç o tradhtar, jep dorëheqjen sa më parë”, ishte një tjetër thirrje.
Sot shënohet dita e 64 e protestës qytetare, e cila nisi kundër një projekti turistik në Zvërnec, por tashmë është shndërruar në një lëvizje popullore kundër klasës politike.
Një qytetar, pjesëmarrës në protestën e 64 kundër qeverisë, ka deklaruar se tubimi do të vijojë deri në dorëheqjen e kryeministrit Edi Rama.
Sipas tij, kryeministri e ka kuptuar se nuk ka rrugë tjetër përveç largimit nga detyra, ndërsa theksoi se kreu i qeverisë nuk ka as mbështetjen e partisë së tij.
“Sot jemi prapë këtu në ditën e 64 të kësaj rezistence për të vazhduar dhe për të kërkuar dorëheqjen e Edi Ramës. Sic duket Edi Rama e ka kuptuar se nuk ka rrugë tjetër vec dorëheqjes së tij. Ai këtë verë, këtë gusht, si cdo gusht nuk ka ikur me pushime. Ai sot kishte mbledhur partinë e tij se e ka kuptuar se nuk e ka mbështetjen e popullit, por si duket nuk ka as mbështetjen e partisë së tij”, tha protestuesi.
Protestuesi tha se tubimi ka ndikuar në legjitimitetin politik të qeverisë dhe kërkoi jo vetëm dorëheqjen e kryeministrit, por edhe krijimin e një qeverie tranzitore.
“Kjo proteste e deligjitimoi kryeministrin! Nuk ndalemi derisa të firmosë dorëheqjen. Kërkojmë dorëheqjen e qeverisë së tij dhe krijimin e një qeverie tranzitore”, tha ndër të tjera qytetari.
Në ditën e 64 të protestës, nje e moshuar tha se arsyet kryesore të pakënaqësisë lidhen me vështirësitë ekonomike, pensionet e ulëta dhe rritjen e çmimeve.
“Protestojmë që Rama të dorëhiqet sa më parë. Pensionet janë të vogla, çmimet janë shumë të shtrenjta. Ilaçet i marrim veresi. Unë 150 mijë lekë marr, ku ti çoj më parë këtu lekët? Edi Rama të ikë sa më parë, mos të na lodhë ne”, tha qytetarja, e cila theksoi se “do protestojmë derisa të ikë Edi Rama”.
Discussion about this post