Presidenti Ilir Meta ka reaguar sot në lidhje me çështjen rreth shkarkimit të tij, që tashmë vendimi përfundimtar i ka mbetur Gjykatës Kushtetuese. Ditën e sotme Meta i është drejtuar me një shkresë kryetares së Gjykatës Kushtetuese, me anë të së cilës, kërkon t’i vihet në dispozicion procedura e ndjekur për të përcaktuar çështjen e shkarkimit.
Meta kërkon një kopje të aktit përmes të cilit rregulloheshin procedurat gjyqësore të Gjykatës Kushtetuese, e veçanërisht procedurat e caktimit të relatorit të çështjes me short, apo procedurat e tjera me të cilat ka funksionuar Gjykata Kushtetuese, deri në miratimin e Rregullores së re, hyrë në fuqi më 27 janar 2022.
“A ka zhvilluar Mbledhja e Gjyqtarëve ndonjë mbledhje, dhe/apo ka marrë ndonjë vendim për pezullimin e shqyrtimit të kësaj çështje përgjatë periudhës 14.06.2021 (moment ky i regjistrimit të çështjes) deri në 14.09.2021 (moment ky që sipas nenit 47, pika 1, dhe 62 pika 1, paragrafi i 1, të ligjit nr. 8577/2000, përbënte dhe afatin përfundimtar maksimal ligjor kur Mbledhja e Gjyqtarëve duhej të shprehej me vendim për kalimin ose jo të çështjes për shqyrtim në seancë gjyqësore publike, brenda 3-muajve nga paraqitja e kërkesës)?
Nëse po, cila është baza ligjore e pezullimit dhe arsyet përse ky vendim deri më sot nuk i është njoftuar Presidentit të Republikës nga Gjykata Kushtetuese. Cili është relatori i çështjes dhe mënyrën e procedimit të Kryetares apo të Gjykatës Kushtetuese për aktimin e tij si relator sipas ligjit, shoqëruar me kopje të dokumentacionit provues mbi praktikën e brendshme administrative të ndjekur për këtë rast për caktimin e relatorit”, shkruan Meta.
Kreu i shtetit kërkon që informacioni dhe kopja e akteve do të përcillet dhe do të vihet në dispozicion të tij brenda datës 31 janar 2022.
Discussion about this post