Tensionet diplomatike mes Spanjës dhe Marokut për krizën e migracionit në Ceuta kanë kaluar kufijtë e politikës dhe tashmë po ndikojnë edhe në organizimin e Kupës së Botës 2030.
Turneu, që do të organizohet bashkërisht nga Spanja, Portugalia dhe Maroku, është përfshirë në polemika, pasi partitë e majta në Madrid dhe Lisbonë po kërkojnë rishikimin e bashkëpunimit me Rabatin.
Në Spanjë, koalicioni i majtë Sumar, pjesë e qeverisë së kryeministrit Pedro Sánchez, ka dorëzuar një propozim në Kongres, duke kërkuar që vendi të rishqyrtojë organizimin e përbashkët të Botërorit me Marokun.
Edhe në Portugali janë shtuar zërat kundër këtij bashkëpunimi. Partia pro-evropiane Livre i ka dërguar një letër kryeministrit Luís Montenegro dhe Federatës Portugeze të Futbollit, duke kërkuar përjashtimin e Marokut nga organizimi i Kupës së Botës 2030.
Në dokument përmenden incidentet në Ceuta, si edhe akuzat e kahershme ndaj Marokut për shkelje të së drejtës ndërkombëtare dhe të drejtave të popullit saharaui.
Federata Portugeze e Futbollit ka bërë të ditur se po ndjek nga afër zhvillimet, por thekson se deri tani nuk ka marrë asnjë kërkesë apo shqetësim zyrtar nga organet ndërkombëtare të futbollit.
Ndërkohë, presidenti i FIFA-s, Gianni Infantino, thuhet se po shqyrton mundësinë që finalja e Kupës së Botës 2030 të zhvendoset nga Madridi në Rabat, në këmbim të mbështetjes së Marokut për kandidaturën e tij në zgjedhjet për president të FIFA-s në vitin 2027.
Edhe pse nuk ka asnjë vendim zyrtar, polemikat rreth organizimit të Botërorit 2030 po shtohen, duke hedhur hije dyshimi mbi një projekt që deri tani është konsideruar simbol i bashkëpunimit mes tre vendeve.
Discussion about this post