Deputeti i Partisë Demokratike, Klevis Balliu, ka reaguar ashpër pas disa ngjarjeve të rënda kriminale të regjistruara gjatë ditës së shtunë në vend, duke akuzuar qeverinë se ka dështuar në garantimin e sigurisë publike.
Në një deklaratë, Balliu rendit vrasjen e një 20-vjeçarit në qytetin e Korçës, përleshjen me plagosje në burgun e Fierit dhe shpërthimin me eksploziv në Durrës, duke i cilësuar si tregues të një situate të rënduar të rendit publik.
Sipas tij, qytetarët nuk ndihen më të sigurt as në hapësirat publike dhe as brenda institucioneve të sigurisë, ndërsa shteti nuk po arrin të parandalojë dhe godasë krimin.
Balliu akuzon kryeministrin Edi Rama se, pas 13 vitesh në pushtet, ka dështuar në atë që ai e cilëson si detyrën themelore të një qeverie: garantimin e sigurisë së qytetarëve.
Ai rikthen në vëmendje edhe akuzat e vazhdueshme të Partisë Demokratike për lidhje mes krimit dhe pushtetit, duke argumentuar se ngjarjet e fundit janë pasojë e dobësimit të shtetit.
Në vijim, deputeti demokrat kritikon edhe narrativën e qeverisë për Shqipërinë turistike, duke thënë se përballë propagandës, qytetarët përballen çdo ditë me një realitet tjetër.
Balliu e lidh situatën e rendit publik edhe me protestat që vijojnë prej 70 ditësh, duke thënë se mijëra qytetarë kanë dalë në rrugë edhe për shkak të mungesës së sigurisë.
Sipas tij, thirrja “Rama, jep dorëheqjen!” merr një tjetër kuptim pas ngjarjeve të fundit kriminale.
“Thirrja e tyre kryesore, ‘Rama, jep dorëheqjen’, jehon me më shumë të vërtetë edhe pas kronikës së të shtunës të mbuluar me gjak”, përfundon Balliu.
Deklarata e plotë:
Dje Shqipëria u zgjua dhe fjeti përsëri me lajme seriale te krimit.
Vrasja e nje 20 vjecari në mes të qytetit të Korçës, përleshje me plagosje në burgun e Fierit dhe shpërthim me eksploziv në Durrës. Tri ngjarje të rënda, në të njëjtën ditë, që tregojnë një realitet të frikshëm: siguria publike në Shqipëri është dorëzuar dhe shnderruar ne pasiguri kronike!
Qytetarët nuk janë më të sigurt as në rrugë, as në qytet, as ne institucionet e sigurise se larte pas hekurave të burgut, ndërsa krimi vepron me një guxim që nuk do ta kishte nëse shteti do të ishte realisht në këmbë.
Kjo nuk është më çështje statistikash, por çështje e jetës së shqiptarëve.
Pas 13 vitesh në pushtet, Edi Rama ka dështuar në detyrën themelore të një qeverie: garantimin e sigurisë së qytetarëve.
Partia Demokratike e ka denoncuar vazhdimisht kapjen e shtetit nga krimi dhe lidhjet e rënda mes botës së krimit dhe pushtetit. Sot pasojat i shohim çdo ditë në rrugët e Shqipërisë.
Kur krimi vret në mes të qytetit, kur ka dhunë brenda burgjeve dhe kur eksplozivët shpërthejnë në qytetet tona, problemi nuk është vetëm krimineli. Problemi është një shtet që nuk e parandalon, nuk e godet dhe nuk e ndëshkon krimin.
Edi Rama mund të vazhdojë të flasë për Shqipërinë turistike, për propagandën dhe për sukseset imagjinare. Por shqiptarët e dinë realitetin: sot në Shqipëri nuk mungojnë kamerat dhe propaganda; mungon shteti.
Rendi publik nuk mund të jetë peng i interesave politike dhe i lidhjeve me krimin.
Shqipëria ka nevojë për një shtet që lufton krimin, jo për një pushtet që bashkëjeton me të.
Dhe për këtë përgjegjësia politike është e qartë: Edi Rama dhe qeveria e tij kanë dështuar të garantojnë sigurinë e shqiptarëve.
Ata mijra qytetare qe protestojne, prej 70 ditesh, kane dale nder te tjera, edhe per rendin dhe sigurine e munguar. Thirrja e tyre kryesore, ‘Rama, jepe doreheqjen’ jehon me e vertete edhe pas kronikes se te shtunes te mbuluar me gjak!
Discussion about this post