Ministria e Mbrojtjes ka bërë të ditur përditësimin e fundit mbi situatën e zjarreve në vend.
Sipas Ministrisë, në operacione janë angazhuar të paktën 227 forca operacionale dhe 16 mjete zjarrfikëse e mbështetëse, ndërsa nga ajri janë kryer 4 angazhime, me 3 helikopterë dhe një avion Air Tractor.
Sakaq, në qarkun e Tiranës, në zonën e Dajtit, pranë fabrikës së ujit Selita, gjatë mesditës janë rishfaqur disa vatra zjarri. Ndërhyrja dhe monitorimi në terren vijojnë, ndërsa sipas autoriteteve nuk ka rrezik për zonat e banuara.
Në Cikallesh të Kavajës, intensiteti i zjarrit ka rënë ndjeshëm dhe vatra po shkon drejt shuarjes së plotë, pas ndërhyrjes së MZSH-së dhe mbështetjes nga ajri të Forcave të Armatosura.
Ndërkohë, në Priskë të Madhe vijon puna për vënien nën kontroll të disa vatrave të vogla.
Në qarkun e Fierit, në zonën Panahor–Ndrenie–Vlosht, Mallakastër, zjarri është aktualisht nën kontroll dhe nuk paraqet rrezik për zonat e banuara. Edhe vatra në zonën Koilac–Greshicë është nën kontroll dhe, sipas autoriteteve, nuk paraqet rrezik për banesat.
Në Abazë të Krujës, situata është stabilizuar dhe në terren kanë mbetur vetëm disa vatra të vogla, në zona me terren të vështirë. Operacionet vijojnë nga strukturat e Emergjencave Civile, Bashkia Krujë, MZSH-ja, shërbimi pyjor dhe Prefektura e Qarkut Durrës. Edhe në këtë zonë nuk raportohet rrezik për banesat.
Situatë më e ndërlikuar paraqitet në Vilëz të Kurbinit, ku zjarri është riaktivizuar në një sipërfaqe pyjore. Për shkak të terrenit të vështirë dhe erës, flakët rrezikonin kishën, varrezat dhe disa banesa pranë zonës.
Për përballimin e situatës janë angazhuar rreth 50 forca nga MZSH-ja, Emergjencat Civile, Policia, strukturat vendore, shërbimi pyjor dhe vullnetarë. Ndërhyrja nga ajri me dy helikopterë ka ndaluar avancimin e flakëve dhe ka shmangur prekjen e kishës, varrezave dhe banesave përreth.
Vatra në Vilëz vijon të jetë aktive dhe po mbahet nën ndërhyrje.
Ministria e Mbrojtjes bën me dije se strukturat e sistemit të Mbrojtjes Civile vijojnë pa ndërprerje operacionet në terren dhe nga ajri, me qëllim izolimin, kontrollin dhe shuarjen e plotë të vatrave aktive në vend.
Discussion about this post