Lionel Messi i ka dhënë lamtumirën e fundit babait të tij, Jorge Messi, i cili ndërroi jetë të premten në moshën 68-vjeçare.
Ylli argjentinas mbërriti në Argjentinë me një fluturim privat nga Miami, së bashku me bashkëshorten Antonela Roccuzzo dhe fëmijët e tyre.
Ceremonia private mortore u zhvillua në varrezat “El Prado”, në qytetin Perez, pranë Rosario.
Në hyrje të varrezave u vendosën kurora me lule dhe mesazhe të shumta nga tifozët për familjen Messi.
“Qëndro i fortë, Leo, të duam”, ishte një nga mesazhet që tërhoqi vëmendjen.
Shkaku zyrtar i vdekjes së Jorge Messit nuk është bërë publik, ndërsa mediat lokale kanë raportuar se ai vuante nga kanceri.
Jorge Messi ishte një figurë kyçe në karrierën e djalit të tij dhe personi që e orientoi drejt futbollit që në moshë shumë të vogël.
Ai ishte trajneri i parë i Lionel Messit te klubi lokal Grandoli në Rosario.
Në vitin 2000, Jorge la gjithçka në Argjentinë për të shoqëruar djalin e tij në Barcelonë, ku nisi rrugëtimi që do ta kthente në një nga futbollistët më të mëdhenj të historisë.
Më pas, ai u bë edhe agjenti i Messit dhe negocioi kontratat e tij të mëdha në Barcelonë, Paris Saint-Germain dhe Inter Miami.
Bota e futbollit ka reaguar me mesazhe ngushëllimi, ndërsa Federata Argjentinase ka vendosur që gjatë kësaj jave të mbahet një minutë heshtje dhe lojtarët të mbajnë shirita të zinj.
Discussion about this post