Banorët e Mirakës në Librazhd kanë protestuar këtë të hënë kundër mënyrës së organizimit të punimeve për zgjerimin e Koridorit VIII, duke ngritur shqetësimin se ndërhyrjet në rrugë u kanë vështirësuar ndjeshëm aksesin drejt fshatit. Sipas banorëve, situata prek jo vetëm Mirakën, por edhe disa fshatra të tjerë të zonës. Ata pretendojnë se 7 fshatra të Bashkisë Librazhd dhe 2 fshatra të Bashkisë Elbasan kanë mbetur me akses vetëm në drejtimin e lëvizjes Elbasan–Librazhd, ndërsa lëvizja në kahun e kundërt bllokohet.
Protestuesit thonë se problemi është bërë edhe më i rëndë pas ndërprerjes së linjave të transportit ndërqytetas. Sipas tyre, banorët që nuk disponojnë automjete private e kanë praktikisht të pamundur të lëvizin drejt qyteteve apo të kthehen në banesat e tyre. “Për ne kjo është një situatë e papërballueshme. Jo të gjithë kanë automjete dhe transporti publik është i domosdoshëm për banorët e fshatrave”, shprehen banorët, të cilët kërkojnë një zgjidhje konkrete dhe të menjëhershme.
Protesta vjen në një kohë kur punimet për zgjerimin dhe ndërtimin e segmentit të Koridorit VIII vijojnë në këtë zonë, ndërsa ndërhyrjet infrastrukturore kanë sjellë ndryshime të rëndësishme në mënyrën e qarkullimit.
Pas kërkesës së banorëve, Autoriteti Rrugor Shqiptar (ARRSH) është shprehur se do të shqyrtojë mundësinë e një zgjidhjeje teknike për problematikën e aksesit. Sipas ARRSH-së, zgjidhja do të vlerësohet në bazë të kushteve të terrenit dhe parametrave të sigurisë rrugore. Banorët, megjithatë, kërkojnë që shqyrtimi të mos mbetet vetëm në nivel teknik, por të pasohet sa më shpejt nga një ndërhyrje konkrete që garanton aksesin e tyre në rrugë dhe rikthen mundësinë e transportit për komunitetin.
Për banorët e Mirakës dhe fshatrave përreth, zhvillimi i Koridorit VIII shihet si një projekt i rëndësishëm për zonën, por ata kërkojnë që përmirësimi i infrastrukturës të mos shoqërohet me izolimin e komuniteteve që jetojnë përgjatë aksit rrugor.
gijotina.com/
Discussion about this post