Autoritetet italiane kanë parandaluar një sulm të mundshëm terrorist duke ndaluar dhe dëbuar me urgjencë një 22-vjeçar me origjinë shqiptare, i cili i kishte betuar besnikëri ISIS-it.
Sipas medias italiane, të riut i është dorëzuar urdhri i dëbimit i nënshkruar nga Ministri i Brendshëm, Matteo Piantedosi, menjëherë pasi zbriti në aeroportin Canova të Trevisos nga një fluturim prej Tirane.
Sipas hetuesve të Policisë së Shtetit dhe DIGOS-it, 22-vjeçari kishte planifikuar deri në detaje një sulm me bombë ndaj qendrës tregtare “Adigeo” në Verona, një nga më të mëdhatë në rajonin e Venetos.
Hetimet nga Departamenti Qendror i Parandalimit treguan se i riu ishte radikalizuar përmes rrjeteve sociale të lidhura me terrorizmin ndërkombëtar islamik. Para se të nisej drejt Italisë, ai kishte kryer trajnimin për ndërtimin e lëndëve plasëse duke konsultuar udhëzues specifikë dhe kishte hapur një llogari bankare për të pranuar fonde nga terroristë të tjerë me të cilët komunikonte online.
Disa nga materialet e nevojshme për ndërtimin e pajisjes vdekjeprurëse dyshohet se i kishte porositur paraprakisht dhe dërguar te të afërmit e tij në provincën e Pordenones, te të cilët kishte deklaruar se do të shkonte për vizitë si turist bashkë me prindërit e tij, të cilët ishin tërësisht të pavetëdijshëm për planet e djalit.
Pas ndalimit në kufi, 22-vjeçari është riatdhesuar menjëherë drejt Shqipërisë me një fluturim direkt dhe i është ndaluar përgjithmonë hyrja në Itali. Këshilltarja e Sigurisë në Verona, Stefania Zivelonghi, përgëzoi forcat e rendit për ndërhyrjen e shpejtë, ndërsa hetuesit italianë po vijojnë punën për të verifikuar rrjetin e mundshëm të mbështetësve apo bashkëpunëtorëve që mund ta ndihmonin të riun në ekzekutimin e planit.
gijotina.com/
Discussion about this post