8 vatra zjarri vijojnë të jenë aktive në vend, ndërsa 5 të tjera janë nën monitorim, sipas bilancit të 24 orëve të fundit të publikuar nga Ministria e Mbrojtjes.
Situata më e ndërlikuar paraqitet në Gurë-Lurë të Dibrës, ku zjarri vijon të kërkojë angazhim të gjerë të forcave në terren.
Sipas të dhënave zyrtare, korridoret e hapura në terren kanë kufizuar përhapjen e flakëve drejt zonave të banuara dhe aktualisht nuk raportohet rrezik për banesat.
Një tjetër vatër aktive është Mali i Dajtit në Tiranë, ku vijon ndërhyrja me 15 efektivë të MZSH-së, 10 forca të ADZM-së dhe 50 efektivë të Forcave të Armatosura, të mbështetur nga dy helikopterë të Forcës Ajrore.
Edhe këtu nuk raportohet rrezik për zonat e banuara. Vatrat në Priskë dhe Vakumone janë nën kontroll dhe po monitorohen.
Në Qafë Helmës dhe Bruç, terreni i vështirë vijon të pengojë ndërhyrjen. Zjarri në Qafë Helmës është shuar nga krahu i Bulqizës, ndërsa mbetet aktiv në drejtim të Selishtës. Nuk raportohet rrezik për banesat në këto zona.
Në Lufaj të Mirditës, operacioni vijon pas hapjes së korridoreve ndarëse, ndërsa ndërhyrja mbështetet edhe nga një helikopter i Forcës Ajrore.
Në Fushë-Lajë të Pukës, zjarri vijon me intensitet të ulët. Në terren janë 10 efektivë zjarrfikës, 16 forca bashkiake dhe 40 efektivë të Forcave të Armatosura. Sipas raportimit zyrtar, nuk ka rrezik për zonat e banuara. Ndërkohë, në Rrjoll, situata po monitorohet, pa raportime për rrezik ndaj banesave.
Discussion about this post