Banorët e Patosit kanë dalë sërish në protestë kundër propozimit për hartën e re territoriale, që parashikon bashkimin e Bashkisë Patos me atë të Fierit.
Kjo është protesta e dytë e zhvilluar nga qytetarët, të cilët me pankarta dhe fjalime kanë kërkuar që qeveria të tërhiqet nga kjo nismë dhe të rishikojë propozimin.
Banorët e kundërshtojnë bashkimin me Fierin duke argumentuar se Patosi ka identitetin, historinë dhe specifikat e tij, ndërsa sipas tyre edhe Bashkia e Patosit ka një performancë të mirë në ofrimin e shërbimeve.
Një prej protestuesve, naftëtar i vjetër, solli në vëmendje kontributin e komunitetit në zhvillimin e qytetit.
“Unë jam naftëtar i vjetër. E kemi bërë me kontribut vullnetar këtë Patos. Spitali, ambulanca, shkolla janë bërë me kontribut vullnetar. Kemi punuar 8 orë në naftë dhe ktheheshim këtu”, u shpreh ai.
Protestuesit i kanë bërë thirrje kryeministrit Edi Rama që të dëgjojë banorët dhe veçanërisht komunitetin e naftëtarëve, duke e cilësuar shkrirjen e Bashkisë Patos si një vendim të papranueshëm.
“I bëjmë thirrje Ramës të bisedojë me naftëtarët, të marrë mendimin e tyre. Është krim të shkrihet bashkia e Patosit. I themi jo reformës së bërë nga Partia Socialiste”, thanë protestuesit.
Një tjetër shqetësim i ngritur gjatë protestës lidhet me pasojat që, sipas banorëve, do të sillte bashkimi me Fierin në shërbimet publike dhe administratën lokale.
Ata paralajmërojnë se shkrirja e bashkisë mund të sjellë reduktim të ndjeshëm të vendeve të punës dhe largimin e institucioneve nga qytetarët.
“Nëse mbyllet bashkia, shkurtimi i fuqisë punëtore do të bëhet me 50%. Sa më e vogël të jetë bashkia, aq më organizim e kërkesë llogarie ka. Kontrollon çdo gjë”, deklaroi një prej tyre.
Banorët theksuan gjithashtu se prania e institucioneve pranë komunitetit e bën më të lehtë zgjidhjen e problemeve të përditshme.
“Sa më afër bashkia e komuna, aq më të zgjidhshme janë problemet. Neve nuk na mposhtin”, u shprehën protestuesit.
Ata vlerësuan edhe punën e Bashkisë Patos, duke argumentuar se qyteti ka pasur përmirësime në hapësirat publike dhe shërbimet lokale.
“Bashkia e Patosit është ndër më të mirat, ku çdo gjë gjelbëron e lulëzon”, thanë qytetarët.
Në përfundim të protestës, banorët paralajmëruan se kundërshtimi nuk do të ndalet dhe se do të vijojnë me protesta të tjera nëse propozimi për bashkimin e Patosit me Fierin nuk rishikohet.
Discussion about this post