Ky është 20-vjeçari portugez që u vra në Ksamil, teksa kishte ardhur në Shqipëri për pushime me miqtë.
Luis Miguel Varela Mendes humbi jetën në orët e para të 18 gushtit, pas një konflikti që nisi pas një feste dhe përfundoi me përdorimin e thikës ndaj tij.
20-vjeçari u gjet i pajetë rreth orës 05:15 pranë resortit “Principote”. Sipas të dhënave të deritanishme të hetimit, ai u godit disa herë me mjet prerës në pjesën e shpinës dhe kraharorit.
I dyshuari kryesor për vrasjen është 29-vjeçari Sokrat Vata, i cili punonte si roje plazhi në të njëjtin resort. Pas ngjarjes, ai tentoi të largohej nga zona, por u kap nga policia në Levan të Fierit, ku dyshohet se po fshihej në bagazhin e një automjeti.
Sipas autoriteteve, Vata ka precedentë penalë në Britaninë e Madhe, ku më herët është dënuar me burgim për trafik droge dhe drejtim të rrezikshëm të automjetit.
Në lidhje me ngjarjen janë arrestuar dhe proceduar edhe persona të tjerë, ndërsa hetimet po vijojnë për të zbardhur të plotë dinamikën e konfliktit dhe rolin e secilit prej të përfshirëve.
Vrasja e turistit portugez në një prej zonave më të frekuentuara të bregdetit shqiptar ka tronditur sezonin turistik dhe ka rikthyer në vëmendje çështjen e sigurisë në resortet dhe lokalet e jugut.
Discussion about this post