Ministria për Evropën dhe Punët e Jashtme, përmes një njoftimi zyrtar, ka shprehur keqardhje për mospërfshirjen e Himnit Kombëtar Shqiptar në një aktivitet kulturor të zhvilluar dje në Pustec.
Në aktivitet morën pjesë Kryeministri i Maqedonisë së Veriut dhe Kryetari i Bashkisë Pustec. Gjatë ceremonisë u luajt himni i Maqedonisë së Veriut, por jo ai shqiptar.MEPJ thekson se, edhe pse aktiviteti ishte organizuar nga një shoqatë lokale, prania e përfaqësuesve të lartë institucionalë i jepte atij rëndësi publike.Ministria e cilëson mospërfshirjen e himnit shqiptar si një mungesë serioze dhe shmangie nga rregullat e protokollit dhe mirësjelljes institucionale.
“MEPJ shpreh keqardhje për faktin që, në një aktivitet kulturor të zhvilluar dje në Pustec, me pjesëmarrjen e Kryeministrit të Maqedonisë së Veriut dhe të Kryetarit të Bashkisë, nuk u luajt edhe Himni Kombëtar Shqiptar, krahas atij të Maqedonisë së Veriut.
Edhe pse aktiviteti ishte organizuar nga një shoqatë lokale, prania e përfaqësuesve të lartë institucionalë dhe të zgjedhurve vendorë i jepte atij një dimension të veçantë publik. Në këtë kontekst, mospërfshirja e Himnit Kombëtar Shqiptar përbën një mungesë serioze dhe një shmangie nga rregullat e shkruara dhe të pashkruara të mirësjelljes dhe protokollit, të cilat kërkojnë dhe imponojnë respektimin e simboleve kombëtare krahas atyre të komuniteteve që ato përfaqësojnë.
Respekti për simbolet kombëtare nuk duhet të jetë çështje politike apo interpretimi. Ai është pjesë e etikës institucionale, e protokollit dhe, mbi të gjitha, e respektit të ndërsjellë, veçanërisht në një hapësirë ku bashkëjetojnë komunitete dhe identitete të ndryshme.
Në Pustec, ashtu si në çdo hapësirë të Republikës së Shqipërisë, respekti për simbolet kombëtare është pjesë e respektit për vetë qytetarët, për vlerat e bashkëjetesës demokratike dhe kulturës qytetare që na bashkon. Është gjithashtu themel i fqinjësisë së mirë dhe marrëdhënieve të shëndosha ndërmjet njerëzve dhe shteteve tona.”, thotë MPEJ.
Ndërkohë, ditën e djeshme, Miskoski u shpreh se detyrimi i qeverisë është të krijojë lidhje më të forta institucionale me maqedonasit në Prespën e Vogël.
“Por dua të them edhe diçka shumë qartë. Maqedonasit jashtë kufijve të Maqedonisë nuk duhet të jenë temë vetëm gjatë festave dhe festivaleve. Kujdesi për gjuhën, kulturën e tyre dhe lidhjet me atdheun duhet të jetë një politikë shtetërore e qëndrueshme.
Politikanët vijnë dhe ikin, qeveritë ndryshojnë dhe mandatet përfundojnë. Por shteti duhet të ketë vazhdimësi në çështjet që janë më të mëdha se një qeveri dhe se një brez. Prandaj detyrimi ynë është të krijojmë lidhje më të forta institucionale me maqedonasit në Prespën e Vogël, mbështetje më të madhe për shoqatat kulturore, më shumë libra, mundësi për mësimin dhe kultivimin e gjuhës maqedonase, më shumë shkëmbime nxënësish dhe të rinjsh dhe shumë më tepër mundësi që të rinjtë e kësaj zone të njohin atdheun, ndërsa të rinjtë nga atdheu të njohin Prespën e Vogël”, deklaroi ai.
Discussion about this post