Futbollisti serb Uroš Milošević është arrestuar të mërkurën në Portugali, pasi policia ndaloi furgonin që ai po drejtonte në autostradën A6. Në automjetin e 31-vjeçarit u gjetën më shumë se 1.5 ton kokainë, me vlerë mbi 70 milionë euro, si dhe armë të kategorisë ushtarake.
Policia Gjyqësore portugeze zhvilloi një operacion në autostradën A6, duke goditur një rrjet kriminal të lidhur me të ashtuquajturin “Karteli Ballkanik”, një organizatë që dyshohet se është aktive në trafikimin e sasive të mëdha të drogës në Evropë.
Ajo që tërhoqi veçanërisht vëmendjen ishte fakti se në drejtimin e furgonit ndodhej Uroš Milošević, ish-futbollist serb.
Sipas autoriteteve, përveç sasisë së madhe të kokainës, në automjet u gjetën edhe dy armë ushtarake të ngarkuara dhe të gatshme për përdorim.
Milošević nuk është emër i njohur në nivelet më të larta të futbollit evropian. Gjatë karrierës së tij ai ka luajtur për disa klube serbe, mes tyre Čukarički, FK IM Rakovica, FK Teleoptik dhe FK Sinđelić Beograd. Ai ka qenë jashtë aktivitetit futbollistik prej rreth tre vitesh.
Arrestimi i tij erdhi pas një tjetër operacioni të madh kundër të njëjtit rrjet kriminal. Një javë më parë, në Spanjë, u arrestuan dy persona dhe u sekuestruan 3.7 ton drogë, në një aksion të zhvilluar në bashkëpunim me autoritetet portugeze.
Sipas hetuesve, “Karteli Ballkanik” ka shtrirje në disa vende evropiane dhe dyshohet se përdor jugun e Spanjës dhe bregdetin portugez si pika të rëndësishme për trafikimin dhe shpërndarjen e sasive të mëdha të kokainës në Evropë.
Autoritetet portugeze po vijojnë hetimet për të përcaktuar rolin konkret të Miloševićit në këtë rrjet kriminal, ndërsa nuk përjashtohen arrestime të tjera.
Discussion about this post