Kërcënoi me armë policët që kërkonin vëllain e tij, arrestohet 41-vjeçari në Elbasan (Emri)

Një 41-vjeçar është arrestuar në Elbasan, pasi dyshohet se ka kanosur me armë manovër 4 punonjës policie, të cilët ishin angazhuar në një operacion për kapjen e vëllait të tij, i shpallur në kërkim.

Sipas Policisë, specialistët e Hetimit të Krimeve në Drejtorinë Vendore të Policisë Elbasan, në bashkëpunim me oficerët e Policisë Gjyqësore të Prokurorisë, arrestuan në flagrancë shtetasin Behxhet Bylyku, 41 vjeç, banues në Elbasan.

Ngjarja ka ndodhur në lagjen “Visarion Xhuvani”, ku gjatë kontrolleve dhe veprimeve operacionale për lokalizimin dhe kapjen e vëllait të tij, i dyshuari dyshohet se ka kanosur katër efektivë të Forcës Operacionale me një send të ngjashëm me armë zjarri.

Gjatë ndërhyrjes, uniformat blu kanë sekuestruar sendin e dyshuar si armë manovër, i cili do t’i nënshtrohet procedurave të mëtejshme të verifikimit.

Vëllai i 41-vjeçarit vijon të jetë në kërkim për veprën penale “Mbajtja pa leje dhe prodhimi i armëve, armëve shpërthyese dhe municionit”.

Njoftimi i policise

DVP Elbasan

Kanosi me armë të dyshuar manovër, punonjësit e Policisë të angazhuar për kapjen e vëllait të tij (shtetas në kërkim), arrestohet 41-vjeçari. Sekuestrohet sendi i ngjashëm me armën e zjarrit.

Specialistët e Hetimit të Krimeve të DVP Elbasan, në bashkëpunim me oficerët e Policisë Gjyqësore të Prokurorisë, arrestuan në flagrancë shtetasin B. B.(Ç.), 41 vjeç, banues në Elbasan.

Ky shtetas, në lagjen “Visarion Xhuvani”, ka kanosur me armë të dyshuar manovër, 4 punonjës të Forcës Operacionale të DVP Elbasan, gjatë kryerjes së kontrolleve dhe veprimeve operacionale të tjera, për kapjen e vëllait të 41-vjeçarit, shtetasit B. B., që është në kërkim për veprën penale “Mbajtja pa leje dhe prodhimi i armëve, armëve shpërthyese dhe municionit”.

Ndërkaq, vijojnë intensivisht kontrollet për kapjen e shtetasit B. B.. Materialet procedurale iu referuan Prokurorisë, për veprime të mëtejshme, për shtetasin B. B.(Ç.), për veprat penale “Kanosja për shkak të detyrës” dhe “Mbajtja pa leje dhe prodhimi i armëve, armëve shpërthyese dhe municionit.