‘Ferit Hoxha nuk zë mend’, Këlliçi: Vijon me etiketime e qëndrime aspak diplomatike ndaj politikës së Kosovës

Nënkryetari i Partisë Demokratike, Belind Këlliçi, ka reaguar në rrjetet sociale ndaj deklaratave të ministrit të Jashtëm, Ferit Hoxha, për Kosovën dhe marrëdhëniet e Shqipërisë me vendet e BE-së.

Këlliçi akuzon kryediplomatin se po vijon me deklarata dhe qëndrime që dëmtojnë imazhin dhe interesat e Shqipërisë në arenën ndërkombëtare.

Duputeti ndalet te deklarata e Hoxhës për “dritëshkurtësi” të politikës në Kosovë dhe te përmendja e Gjermanisë si një vend “jo miqësor” ndaj Shqipërisë.

Këlliçi rikujton edhe gafat e mëparshme të ministrit, duke e akuzuar se ka krijuar incidente me shqiptarët e Maqedonisë së Veriut dhe Italinë.

Ai shprehet se Shqipëria nuk mund të përballojë tensione me fqinjët dhe aleatët për shkak të deklaratave të kryediplomatit.

Reagimi

Teknicieni i kthyer në patronazhist militant, Ferit Hoxha, nuk zë mend! Vijon me etiketime e qëndrime aspak diplomatike.

Ministri i Jashtëm Ferit Hoxha vijon të habisë me qëndrimet e tij dhe sidomos me etiketimet e fjalorin që përdor. Mësohet se në prezantimin që ka bërë në takimin e Pogradecit, duke folur për raportet dhe politikën mbi Kosovën, është shprehur se politika atje ka dritëshkurtësi!

Ndërsa lidhur me prioritetin e integrimit, ka dalluar vende të BE që nuk janë miqësore me ne, e që mund të ngadalësojnë këtë proces, ku ka veçuar Gjermaninë ‘armike’.

Kryediplomati që u paraqit si zbulim nga Rama, nuk po mëson nga gafat e tij.

Ai shkaktoi një skandal muaj më parë kur në një komunikim me bashkëpunëtorët e tij, i cilësoi shqiptarët e Maqedonisë së Veriut si idiotë.

Më tej, krijoi një incident me italinë, ku u shpreh se kampet e emigratëve si ato në Shëngjin do të mbylleshin.

Në të dy këto raste u deshën sqarime pa fund për të ndrequr gabimet trashanike.

Por mesa duket, Feriti vazhdon në të njëjtën linjë. Duke e cilësuar Prishtinën zyrtare me dritëshkurtësi politike, dhe duke thënë se Gjermania qenka jo miqësore me ne.

Në prezantimin e Pogradecit ai ka ngjallur habinë e të gjithëve. Nga burime serioze mësohet se është kërkuar të vijohet me shpejtësi urgjente në paraqitjet e tjera, për të tejkaluar këtë moment.

Mes shumë skandaleve dhe aferave të qeverisë, ndoshta këto gafa të kryediplomatit ngjajnë si të parëndësishme. Por Shqipëria nuk e ka luksin që të krijojë probleme me fqinjët apo aleatët, për shkak të delirit, fodullëkut apo militantizmit të Ministrit të Jashtëm.