Erjona Ismaili nuk do të vijojë të mbajë detyrën e bashkëkryetares së Partisë Socialiste në Vlorë.
Ministrja e Shtetit për Marrëdhëniet me Parlamentin ka bërë të ditur në rrjetet sociale se dorëheqja e saj nga kjo përgjegjësi, vjen në kuadër të riorganizimit të strukturave të PS-së.
Ismaili shpjegon se largimi i saj synon t’i japë mundësi procesit të përzgjedhjes së drejtuesve të rinj të strukturës socialiste në Vlorë.
“Ka qenë privilegj dhe përgjegjësi që, për 1 vit e 3 muaj, të drejtoja si bashkëkryetare Partinë Socialiste të Vlorës, falë besimit dhe mundësisë së dhënë nga Kryetari i Partisë Socialiste, Edi Rama.
Një detyrë që jam përpjekur ta ushtroj me përkushtim, korrektësi dhe integritet, e vetëdijshme për përgjegjësinë që mbart drejtimi dhe përfaqësimi i një strukture kaq të rëndësishme.
Sot, në kuadër të fazës së fundit të riorganizimit të Partisë Socialiste, jap dorëheqjen nga detyra e bashkëkryetares, duke i hapur rrugë procesit demokratik të përzgjedhjes së drejtuesve të rinj të Partisë Socialiste të Vlorës.
Faleminderit çdo socialisti, anëtari, drejtuesi dhe bashkëpunëtori për mbështetjen, besimin dhe punën e përbashkët gjatë kësaj periudhe, duke më nxitur të jap më të mirën dhe të kontribuoj për një model drejtimi të bazuar te puna, përgjegjësia dhe respekti për njerëzit.
Mirënjohëse për këtë kapitull dhe për gjithçka ndërtuam së bashku”, shkruan Ismaili.
Discussion about this post