Kreu i Grupit Parlamentar të Partisë Socialiste, Taulant Balla, ka njoftuar se projektligji që adreson vendimin e Gjykatës Kushtetuese për pagat e magjistratëve do të kalojë për shqyrtim dhe miratim në Kuvend më 17 shtator.
Pas mbledhjes së Konferencës së Kryetarëve, Balla iu përgjigj kritikave të opozitës për zbatimin e vendimit të Kushtetueses, duke deklaruar se dy deputetë të PS-së kanë depozituar projektligjin brenda afatit të përcaktuar nga Gjykata.
Ndërkohë kreu i Grupit të PS, ironizoi opozitën për mbështetjen ndaj gjyqtarëve duke thënë: Atyre që iu djeg barku, që kur iu teket shkojnë e shajnë me libër shtëpie prokurorë dhe gjyqtarë dhe sot mendojnë se duhet të mbështesin pagat e gjyqtarëve.
Balla tha se nisma do të trajtohet me prioritet në Kuvend, por nuk do të kalojë me procedurë të përshpejtuar.
Sipas Ballës, kompetencat për përcaktimin e pagave i ka Kuvendi.
“Në Kuvend ka 140 deputetë, por vetëm 2 deputetë të PS-së kanë dorëzuar një projektligj që adreson vendimin e Kushtetueses. Kështu po e ushtrojmë përgjegjësinë që na takon. Kemi parashikuar shqyrtimin dhe miratimin e këtij projektligji në datën 17 shtator.
Në demokraci, secili ka këndvështrimin e vet, jurisprudenca nuk është ekzakte. Projektligji është depozituar brenda afatit të caktuar nga Kushtetuesja dhe do të shqyrtohet me prioritet. Është një projektligj që nuk shqyrtohet me procedurë të përshpejtuar.
Atyre që iu djeg barku, që kur iu teket shkojnë e shajnë me libër shtëpie prokurorë dhe gjyqtarë dhe sot mendojnë se duhet të mbështesin pagat e gjyqtarëve… Si qytetar mendoj se, në një shtet demokratik, me ndarje të pushteteve, kompetenca për caktimin e pagave është vetëm e Kuvendit. Prisni të flasë Kuvendi”, tha Balla.
Discussion about this post