Qytetarët do të mblidhen këtë të enjte në sheshin përpara Kryeministrisë, ndërsa shënojnë ditën e 103-të të revoltës së tyre kundër qeverisë.
Tubimi vjen pas protestës së një dite më parë, e cila solli edhe një ndryshim të mënyrës së organizimit të aksionit.
Gjatë marshimit, qytetarët u ndalën në disa prej kryqëzimeve kryesore të kryeqytetit, ku qëndruan duke bllokuar përkohësisht qarkullimin e automjeteve. Mes pikave ku u zhvillua aksioni ishte kryqëzimi te Rruga e Elbasanit, si dhe ai në drejtim të Sheshit “Skënderbej”.
Protestuesit lëvizën nga një zonë në tjetrën, ndërsa marshimi u shoqërua me flamuj kombëtarë, pankarta dhe thirrje të forta kundër qeverisë. “Arrestoni Ramën, arrestoni Ballukun” dhe “Shqipëria kërkon revolucion” ishin ndër sloganet e përsëritura në rrugët e kryeqytetit.
Përpara marshimit, nga podiumi para Kryeministrisë folën aktivistë dhe përfaqësues të shoqërisë civile, të cilët kërkuan vijimin e protestës dhe zgjerimin e pjesëmarrjes qytetare.
Ambientalisti Sazan Guri bëri thirrje që kauza të vendoset mbi ndasitë mes protestuesve. “Kauza është më e rëndësishmja, ajo na mbledh, na organizon dhe na bën të harrojmë zënkat”, deklaroi ai.
Mjeku Ermal Pashaj kritikoi qeverinë dhe kërkoi që qytetarët të vazhdojnë reagimin. “Duhet të japim zgjidhje. Është futur dhe përçarje mes nesh. Nuk duhet të ndodhë. Duhet të reagojmë ndaj lakut në fyt që po na vë qeveria”, u shpreh Pashaj.
Gjatë protestës pati edhe mesazhe për zhvillimet e fundit politike dhe deklaratat e ish-zëvendëskryeministrit Arben Ahmetaj. Aktivistët paralajmëruan vijimin e aksionit dhe deklaruan se protesta do të prodhojë “dinamika të reja”.
Aktivisti Artan Daci, në një intervistë në një lidhje direkte nga Londra, ka folur për protestat kundër kryeministrit Edi Rama dhe protestën kombëtare që pritet të zhvillohet më 12 shtator, ku pritet të marrin pjesë edhe pjesëtarë të diasporës shqiptare.
Daci u shpreh se protesta duhet të përshkallëzohet dhe të vijojë edhe gjatë ditës, me synim bllokimin e institucioneve.
“Nesër nisemi drejt Tiranës! Nuk ka pasur përshkallëzim të protestës, që të jetë protesta edhe gjatë ditës, që të bllokojmë institucionet. Kjo do të jetë një nga lëvizjet që ai të largohet. Nuk ka pasur një qëndresë që dhe institucionet e tjera të bllokohen. Ndaj bëjmë thirrje që nga mosha 16 vjeç e sipër, t’i marrim vetë dhe të tjerët të bashkohen me ne. Më pas do të kemi të lehtë që të arrijmë qëllimin tonë dhe që më pas të japë dorëheqjen Rama.”, tha ai.
Pikërisht marshimi dhe bllokimi i kryqëzimeve shënuan elementin kryesor të protestës së djeshme.
Në vend që aksioni të përfundonte pas fjalimeve para Kryeministrisë, qytetarët e zhvendosën atë në rrugët e Tiranës, duke bllokuar përkohësisht disa akse dhe duke vijuar thirrjet kundër qeverisë.
Krahas protestës tek kryeministria, qytetarët e kanë vijuar revoltën edhe përpara Parlamentit. Në seancën e së martës, që shënoi nisjen e sesionit të ri parlamentar, ata i “pritën” deputetët dhe i qëlluan me vezë dhe domate.
Discussion about this post