Kryeministri Edi Rama ka reaguar ndaj vendimit të Gjykatës Administrative lidhur me rritjen e pagave të gjyqtarëve, duke thene se “ka hapur dyert e thesarit për rritjen e rrogave të veta pa miratimin e parlamentit”.
Me anë të një postimi rrjetet sociale, kreu i qeverisë vë në pikëpyetje shpejtësinë me të cilën është marrë vendimi dhe duke e akuzuar gjykatën se ka ndërhyrë në një çështje që lidhet me përdorimin e fondeve të Buxhetit të Shtetit.
Rama ironizon duke thënë se nëse i njëjti standard do të zbatohej për çdo qytetar apo institucion, shqiptarët do të ishin të gatshëm t’u falnin gjyqtarëve një pjesë të pagës.
“Por të marrësh sa hap e mbyll sytë masën e parë të sigurisë në historinë e botës, jo për të ndaluar po për të nxitur për interesin vetjak ekzekutimin e një akti që me gjasë cënon ligjin dhe interesin publik, ndërkohë që mijëra e mijëra dosje hallesh presin me vite në sirtarët e gjykatës në fjalë, kjo është diçka tejet turbulluese”, thuhet ne reagimin e kreut te qeverise.
Kujtojmë që sot Gjykata Administrative mori një vendim ku urdhëroi Ministrinë e Financave dhe degën e thesarit të Tiranës të zhbllokojë menjëherë pagat për gjyqtarët dhe administratën e Gjykatës së Posaçme të shkallë së parë.
Reagimi i Edi Ramës
Sikur Gjykata Administrative të kishte standard për çdo qytetar apo institucion në hall, shpejtësinë e skëterrës me të cilën paska vepruar sot për të hapur dyert e thesarit për rritjen e rrogave të veta pa miratimin e parlamentit, unë besoj se çdo shqiptar i punësuar do ishte gati t’ia falte një gjysëm rroge gjykatësve…
Por të marrësh sa hap e mbyll sytë masën e parë të sigurisë në historinë e botës, jo për të ndaluar po për të nxitur për interesin vetjak ekzekutimin e një akti që me gjasë cënon ligjin dhe interesin publik, ndërkohë që mijëra e mijëra dosje hallesh presin me vite në sirtarët e gjykatës në fjalë, kjo është diçka tejet turbulluese!
Ja edhe në tabelën bashkëngjitur çfarë kërkon Gjykata Administrative në dyert e thesarit të shtetit pa kaluar fare nga parlamenti, ndërkohë që e përsëris: Dyert e thesarit të shtetit i hap vetëm pushteti i pavarur legjislativ dhe Kuvendi i Shqipërisë do të bëjë detyrën e tij për këtë temë, në respekt të vendimit të Gjykatës Kushtetuese, ditën e enjte 17 shtator.
Discussion about this post