Prokuroria e Posaçme Kundër Korrupsionit dhe Krimi i Organizuar, ka caktuar masën e sigurisë “Arrest me burg” për dy punonjësit e policisë të cilët pasi kanë arrestuar një shtetas të dënuar me dhjetë vjet e 6 muaj burg, e kanë lënë sërish të lirë pas përfitimit të një shume prej 10 mijë euro.
Personi me inicialet A.M. është person në kërkim për efekt të ekzekutimit të një vendimi gjyqësor të formës së prerë të ish-Gjykatës për Krime të Rënda, sipas të cilit ky shtetas ishte dënuar me 10 vjet e 6 muaj burgim.
Në datën 10 Gusht 2021, punonjësit e policisë të Sektorit të Forcës së Posaçme Operacionale në Policinë e Durrësit, V.B. dhe G.LL., pasi janë vënë në dijeni të vendit ku ndodhej personi në kërkim, e kanë lokalizuar atë dhe e kanë kapur duke e marrë në automjetin me të cilin lëviznin. Pasi kanë negociuar me personin në kërkim A.M., punonjësit e policisë V.B. dhe G.LL. e kanë lënë të lirë, në shkëmbim të marrjes prej tij të një shumë prej 10.000 euro.
Mbi bazën e kërkesës së Prokurorisë së Posaçme Kundër Korrupsionit dhe Krimit të Organizuar, Gjykata e Posaçme e Shkallës së Parë për Korrupsionin dhe Krimin e Organizuar, ka caktuar masën e sigurisë “Arrest në burg”, ndaj punonjësve të policisë, si persona të dyshuar për kryerjen e veprës penale. Masat e sigurimit personal për dy punonjësit e policisë së shtetit u ekzekutuan ditën e sotme.
Po kështu nga gjykata është caktuar masa e sigurisë “Arrest në burg”, ndaj personit A.M., si person i dyshuar për kryerjen e veprës penale të korrupsionit aktiv të personave që ushtrojnë funksione publike.
Discussion about this post