Një video e publikuar së fundmi në rrjetet sociale ka marrë vëmendje të madhe, ku shihet një grup të rinjsh që protestojnë përpara hyrjes së një ndërtese në Nju Jork, pikërisht në momentin kur po mbërrinte kryeministri i Shqipërisë, Edi Rama.
Në pamjet e shpërndara në mediat sociale, dëgjohen të rinjtë që thërrasin me tone të larta “Mafia, mafia!” në drejtim të shefit të qeverisë shqiptare.
“Edi Rama kriminel, e gjithë Shqipëria të urren”, i thonë ata.
Ndërsa Rama po i afrohej hyrjes së godinës i rrethuar nga ekipi i tij i mbrojtjes, disa nga protestuesit kanë qëlluar edhe me vezë në drejtim të tij.
Në krah të Ramës ndodhej bashkëshortja e tij, Linda Rama, si dhe kreu i grupit parlamentar të Partisë Socialiste, Taulant Balla.
Përballja në SHBA vjen në një moment kur në Shqipëri vijon debati i fortë publik dhe politik rreth Shërbimit Informativ të Shtetit (SHISH) dhe skandalit të Vlora Hysenit, çështje që ka nxitur akuza dhe polemika të shumta në skenën politike shqiptare.
Kryeministri Rama ndodhet prej ditës së shtunë në Shtetet e Bashkuara, ku sot më 25 shtator pritet të jetë një nga folësit në Asamblenë e Përgjithshme të Kombeve të Bashkuara.
Discussion about this post