Protesta qytetare kundër qeverisë vijon sot me ditën e 121-të, ndërsa qytetarët dhe aktivistët pritet të mblidhen sërish në Tiranë, një ditë pas protestës së 120-të, e cila u shoqërua me fjalime, pankarta, flakadanë dhe marshim në rrugët e kryeqytetit.
Protesta e së dielës nisi me grumbullimin e qytetarëve dhe vijoi me fjalime pranë Kryeministrisë. Pas përfundimit të fjalimeve, protestuesit marshuan në rrugët e Tiranës, duke shoqëruar lëvizjen me flamuj, pankarta dhe flakadanë. Gjatë marshimit u dëgjuan thirrje si “Edi Rama, jep dorëheqjen”, “Ju erdhi fundi”, “Arrestoni Ramën”, “Revolucion”, “Studentë bashkohuni, kombi na thërret” dhe “Poshtë narkoshteti”.
Një prej mesazheve të përsëritura gjatë protestës ishte edhe “Shqipëria nuk shitet”, ndërsa protestuesit kërkuan pjesëmarrje më të madhe të të rinjve, me thirrjen “Pa rini nuk ka Shqipëri”. Pankartat dhe sloganet e ditës së 120-të pasqyruan kërkesat e protestuesve për ndryshime politike dhe institucionale.
Në qendër të kërkesave vijon të jetë dorëheqja e kryeministrit Edi Rama. Protestuesit kërkojnë gjithashtu krijimin e një qeverie tranzitore dhe ndryshimin ose anulimin e disa ligjeve që, sipas tyre, janë në kundërshtim me interesat e qytetarëve. Organizatorët dhe pjesëmarrësit kanë deklaruar se protesta do të vijojë edhe pas përmbushjes së 120 ditëve.
Një nga mesazhet e forta të protestës së djeshme erdhi nga aktivisti Dritan Goxhaj, i cili deklaroi se nuk ka kthim pas dhe se protesta duhet të vijojë pa përshkallëzim të dhunshëm. Sipas tij, përdorimi i dhunës do t’i shërbente pushtetit, ndërsa protestuesit duhet të vazhdojnë qëndresën paqësore. Goxhaj tha se synimi i tyre është një Shqipëri e çliruar nga korrupsioni dhe nepotizmi, ndërsa theksoi se lodhja është pjesë e “çmimit të lirisë”.
Goxhaj ngriti gjithashtu kritika ndaj mënyrës së funksionimit të institucioneve dhe sistemit shëndetësor, duke kërkuar që drejtuesit e policisë të mos lidhen me krimin dhe që qytetarët të kenë shërbime shëndetësore funksionale. “Jemi këtu jo sepse nuk jemi lodhur dhe nuk kemi zgjidhje tjetër, por besojmë në këtë Shqipëri”, deklaroi ai.
Gjatë ditës së 120-të, protestuesit përdorën edhe një tjetër mesazh simbolik, duke ironizuar shprehjen “Noc Rrok” të kryeministrit Rama me pankartën “Knock-knock”, në një referencë ndaj kërkesave të tyre për drejtësi dhe përgjegjësi institucionale. Në të njëjtën protestë u përsëritën edhe thirrjet për arrestimin e Ramës.
Protesta e djeshme u zhvillua në një moment të tensionuar të debatit politik, pas zhvillimeve rreth ish-drejtueses së SHISH, Vlora Hyseni, dhe publikimit të materialeve nga hetimi. Çështja ishte një nga temat e përmendura edhe në protestë, ndërsa protestuesit kërkuan përgjegjësi dhe hetim nga institucionet e drejtësisë.
Në ditën e 120-të u shfaqën gjithashtu mesazhe kundër qeverisë lidhur me AKSHI-n dhe çështje të tjera që kanë dominuar protestat e ditëve të fundit. Një prej pankartave u drejtohej SPAK-ut me kërkesën për veprim, ndërsa gjatë marshimit u përsëritën thirrjet për vënien para drejtësisë të zyrtarëve.
Discussion about this post