Kombëtarja shqiptare e futbollit është gati për sfidën e dytë në fazën e grupeve të Ligës së Kombeve.
Pas startit me fitore ndaj Bjellorusisë, kuqezinjtë mbyllën përgatitjet në Tiranë paraditen e së hënës dhe pasdite udhëtuan drejt San Marinos. Në konferencën zyrtare për shtyp nga stadiumi pritës, përballë gazetarëve dolën tekniku kuqezi dhe kapiteni Berat Gjimshiti, të cilët analizuan gjendjen e skuadrës dhe objektivat për këtë transfertë.
Sipas Gjimshitit, Nations League është një kompeticion që jep shansin për kualifikimin për në Evropian.
“Liga e Kombeve që na jep opsion për Europianin. Hapi i parë ishte ky te ndeshja e fundit, që zhvilluam një ndeshje të mirë dhe fituam me meritë. Synimet janë të forta, duam vendin e parë dhe duhet të përmirësohet gjithë grupi që të luajë bashkë dhe të japë 100% për 90 minuta. Në këtë nivel, shumë shpejt ndryshon loja nëse gabon. Futemi në fushë me mentalitetin e duhur. Të jemi gati 100%. Varet si do luajë San Marino, por edhe më shumë si do luajmë ne. Me agresivitetin dhe kualitetin që kemi, do ia dalim bashkë. Duhen 11 lojtarë në fushë, ata nga pankina do jenë shumë të rëndësishëm nesër. Kjo duhet të jetë forca jonë nesër-shtoi Gjimshiti
Sa i përket situatës në grup, Shqipëria ndan kreun e tabelës me Finlandën me nga 3 pikë të plota, ndërsa Bjellorusia dhe San Marino mbeten pa pikë pas raundit të parë. Historiku i përballjeve flet tërësisht në favor të kuqezinjve: në 4 ndeshjet e zhvilluara mes tyre, Shqipëria numëron 4 fitore, me 13 gola të shënuar dhe asnjë të pësuar. Ndeshja luhet mbrëmjen e së martës, ku kombëtarja kërkon 3-pikëshin e radhës për të ruajtur ecurinë e plotë në grup.
gijotina.com/
Discussion about this post