Sekretari për Reagimin Qytetar në Partinë Demokratike, Erges Eskiu, është përballur me kryeministrin Edi Rama gjatë vizitës së këtij të fundit në zonën e ish-Uzinës, ambient i cili tashmë është kthyer në një hapësirë të përdorur nga kompania “KAYO”.
Eskiu i ka paraqitur Ramës disa prej shqetësimeve kryesore të banorëve të zonës, duke u ndalur veçanërisht te mungesa e ujit të pijshëm, një problem që, sipas banorëve, vijon prej 13 vitesh.
Situata është tensionuar më tej kur qytetarët kanë nisur të thërrasin në drejtim të kryeministrit, me slogane si “Hajdut” dhe “Rama në burg”. Pas reagimit të turmës, Rama është larguar nga zona i shoqëruar nga dhjetëra efektivë të Gardës.
Vizita e kryeministrit ishte prezantuar si një takim me banorët për të dëgjuar nga afër problematikat e tyre.
Teksa SPAK po heton Ron Yeffet, Partia Demokratike thotë se ai është pjesë e një skeme mafioze të grabitjes së parave të buxhetit të shtetit, me përfitues real kryeministrin Edi Rama.
Sipas Sali Berishës, janë vetë dokumentat zyrtare që e vërtetojnë këtë, duke shtuar se Shoqëria Timak, ku Yeffet është aksioner, nuk plotësonte asnjë kriter për të hyrë në bashkëpunim me kompaninë shtetërore KAYO për prodhimin e armëve. Kreu i PD pretendoi se kompanitë e lidhura me biznesmenin Ron Yeffet kanë përfituar deri tani 45 milionë euro nga fondet publike si dhe prona shtetërore.
“Në një skemë mafioze të ndërtuar nga Edi Rama, të mbështetur fuqimisht nga Edi Rama me ligje, me vendime, Roni Yeffet de facto kompanisë së tij nga buxheti i taksapaguesve shqiptarë, nga paratë e tyre, i janë dhënë gjer sot 45 milionë euro. Kësaj here fillon me një podcast, ku një zonjë, që do ta quajmë tani e tutje Miss Autoblindi ose Arjeta Puca, dëshmon në studion e podcast-it të Edi Ramës se ajo bën mrekullira, se ajo prodhon makineri ushtarake të klasit ndërkombëtar, midis tyre edhe autoblinda. Pas kësaj, Edi Rama miraton ligje dhe vendime për të ndërtuar këtë skemë piramidale të tmerrshme, por kësaj here kryekëput në kurriz të qytetarëve shqiptarë.”, tha Berisha.
Discussion about this post