Protesta e 131-të kundër qeverisë është zhvilluar sot në një tjetër pikë të Tiranës, këtë herë pranë Parlamentit, ku deputetët po votojnë projektin për reformën e re territoriale.
Tubimi ka nisur që në orët e paradites, ndërsa protestuesit janë përballur me një prani të shtuar të forcave të policisë, të vendosura në kordon rreth godinës së Kuvendit.
Në fokus të protestës ka qenë votimi i reformës territoriale, për të cilin qytetarët kanë kërkuar anulimin. Përmes pankartave dhe thirrjeve, ata kanë kundërshtuar ndryshimet e propozuara nga mazhoranca dhe kanë deklaruar se nuk pranojnë shkrirjen apo bashkimin e njësive vendore.
“Shkrini qeverinë, jo bashkitë”, është një prej mesazheve të përcjella gjatë tubimit.
Krahas kundërshtimit ndaj reformës, protestuesit kanë kërkuar edhe largimin e qeverisë, duke bërë thirrje për dorëheqjen e kabinetit.
Një tjetër kërkesë e përsëritur gjatë protestës lidhet me ish-zëvendëskryeministren Belinda Balluku. Protestuesit kanë kërkuar që ajo të vihet përpara drejtësisë dhe të arrestohet.
Tubimi vijon në kushtet e një pranie të fortë policore pranë Parlamentit, ndërsa brenda godinës po zhvillohet seanca plenare ku pritet të hidhet në votim reforma territoriale.
Discussion about this post