Deputetja e Partisë Demokratike, Jorida Tabaku, së bashku me deputetin Kliti Hoti, ngriti shqetësimin për vështirësitë e sektorit fason gjatë një vizite në një biznes prodhues në Shkodër. Sipas saj, zhvlerësimi i euros dhe rritja e kostove po e çojnë aktivitetin drejt pezullimit.
Tabaku deklaroi se biznesi, i cili dikur kishte 140 punonjës, sot ka vetëm 30. Ajo bëri të ditur gjithashtu se një pjesë e makinerive kanë mbetur stok, ndërsa dy trajlera të mbushur me pajisje pritet të kthehen në Itali.
“Ky është një nga prodhimet e fundit ‘Made in Albania’ që ky biznes po realizon”, u shpreh deputetja, duke paralajmëruar se tkurrja e prodhimit fason përbën shqetësim për ekonominë dhe punësimin.
Sipas Tabakut, euroja, e cila sipas saj këmbehet me rreth 90 lekë, ka ulur me të paktën 35% vlerën që bizneset fason përfitojnë nga produktet e tyre. Ajo përmendi gjithashtu kostot e sigurimeve shoqërore, transportit dhe shpenzimet e tjera operative si faktorë që rëndojnë aktivitetin e kompanive eksportuese.
Deputetja theksoi se pasojat nuk kufizohen vetëm te një biznes apo te qyteti i Shkodrës, por lidhen me të ardhmen e kapaciteteve prodhuese në vend dhe mundësitë e punësimit për brezat e rinj.
“Shqipëria nuk po eksporton më produkte ‘Made in Albania’ dhe kjo është një këmbanë alarmi”, deklaroi Tabaku, duke kërkuar që qeveria t’i kushtojë më shumë vëmendje mbështetjes së prodhimit dhe punësimit.
Ajo argumentoi se ekonomia shqiptare duhet të orientohet drejt prodhimit dhe jo të mbështetet vetëm te sektorë të tjerë. Në përfundim, Tabaku e cilësoi situatën si një paralajmërim për nevojën e një modeli ekonomik që, sipas saj, u shërben shumicës së qytetarëve dhe jo një pakice.
Discussion about this post