Tirana është përfshirë sërish nga protestat, ndërsa këtë herë në rrugë kanë dalë edhe studentë e gjimnazistë, të cilët kanë ndërprerë procesin mësimor për t’iu bashkuar tubimeve që po zhvillohen në disa zona të kryeqytetit.
Studentët e Mjekësisë kanë bojkotuar mësimin dhe janë grumbulluar në rrugë, duke nisur më pas marshimin drejt qendrës së qytetit. Sipas raportimeve nga terreni, ata kanë kaluar pranë zonës së njohur si “Medreseja” dhe kanë vijuar lëvizjen në drejtim të qendrës së Tiranës.
Por protesta nuk është kufizuar vetëm te studentët universitarë. Edhe nxënësit e gjimnazit “Partizani” kanë bojkotuar mësimin dhe kanë dalë jashtë ambienteve të shkollës për t’iu bashkuar revoltës qytetare.
Përfshirja e gjimnazistëve dhe studentëve i jep një tjetër dimension protestës së kësaj të mërkure. Ndryshe nga tubimet që zhvillohen vetëm në sheshe apo përpara institucioneve, këtë herë bojkoti ka prekur drejtpërdrejt edhe procesin mësimor në institucionet arsimore nga të cilat vijnë pjesëmarrësit.
Zhvillimet e sotme vijnë pas një dite të tensionuar në Tiranë. Protesta e 13 tetorit u shoqërua me përplasje dhe episode dhune, ndërsa ndërhyrja e policisë përfundoi me arrestimin e 16 personave dhe procedimin penal të 49 të tjerëve.
Bilanci i një dite më parë nuk e ka ndalur vijimin e tubimeve. Përkundrazi, këtë të mërkurë protesta ka përfshirë edhe grupe studentësh dhe gjimnazistësh, të cilët kanë zgjedhur të mos zhvillojnë mësim, por të dalin në rrugë.
Discussion about this post