19-vjeçari i cili mbeti i plagosur gjatë protestës së një dite më parë në kryeqytet, po i nënshtrohet një ndërhyrjeje kirurgjikale për shkak të dëmtimeve që pësoi në këmbë.
I riu ka pësuar frakturë në këmbë pas përplasjes me efektivët e Policisë gjatë protestës në Tiranë. Sipas raportimeve, dëmtimi erdhi si pasojë e goditjeve nga punonjësit e policisë.
Pamjet e incidentit kanë nxitur reagime dhe kanë ngritur pikëpyetje mbi ndërhyrjen e forcave të rendit dhe përdorimin e forcës ndaj protestuesve.
Policët ia thyen këmbën, por edhe pasi ia thyen, vazhduan ta godisnin. Ai kishte humbur ndjenjat, por ata vazhdonin ta godisnin edhe kur ishte pa ndjenja. Kur u zgjua, sepse kishte rënë të fikët, ishte në gjendje shumë të rëndë. Kishte shenja dhe mavijosje në të gjithë trupin nga goditjet.
Ndërkohë, në kuadër të masave të marra pas ngjarjes, pesë punonjës policie janë pezulluar nga detyra.
Ministrja e Shëndetësisë, Klodiana Spahiu, ka vizituar në Spitalin e Traumës 19-vjeçarin, të cilit, efektivët e policisë i thyen këmbën pas dhunës së ushtruar.
Ai dëgjohet duke i thënë ministres se nuk kishte lidhje me protestën dhe se ishte duke kaluar në rrugë.
Në lidhje me rastin e të riut, janë pezulluar nga detyra katër efektivë dhe shefi i Komisariatit të Policisë Nr. 1, ndërsa kanë nisur hetimet nga Agjencia e Mbikëqyrjes Policore (AMP) dhe Prokuroria.
Discussion about this post