Deputeti i Partisë Mundësia, Erald Kapri, ka publikuar pamjet e momentit kur, sipas tij, u sulmua me spraj helmues nga një person civil i maskuar, përpara Kryeministrisë.
Kapri pretendon se personi ndodhej pas forcave të policisë dhe e sulmoi teksa ai po kërkonte që t’i përcillej kryeministrit Edi Rama mesazhi për t’i dhënë fund situatës së tensionuar.
“Ky është momenti kur sulmohem pabesisht nga kapuçziu i Skënder Hitajt. Po i kërkoja t’i thoshte Ramës t’i jepte fund kësaj situate, sepse nuk kanë faj policët. Edhe ata, ashtu si studentët, jetojnë në këtë vend dhe e duan këtë vend. Por kapuçzinj si ky që guxoi të sulmojë një deputet, imagjinoni çfarë u kanë bërë të rinjve”, u shpreh Kapri.
Deputeti deklaroi se incidenti ndaj tij është vetëm një pjesë e asaj që, sipas tij, kanë përjetuar studentët gjatë pesë ditëve të protestave. Ai tha se disa të rinj i kanë rrëfyer personalisht përvojat e tyre dhe se dëshmitë do të ndiqen deri në fund.
Kapri paralajmëroi se do të depozitojë kallëzim në Strukturën e Posaçme kundër Korrupsionit dhe Krimit të Organizuar (SPAK) ndaj drejtorit të Përgjithshëm të Policisë së Shtetit, Skënder Hitaj, si dhe ndaj personave të tjerë që, sipas tij, kanë urdhëruar ose ushtruar dhunë ndaj të rinjve.
“Do të bëj kallëzim në SPAK për Skënder Hitajn dhe për këdo në strukturat e Policisë që ka urdhëruar apo ushtruar dhunë. Do të mbani përgjegjësi për çdo të ri të dhunuar!”, deklaroi deputeti.
Discussion about this post