Nga Shkodra dhe bashkitë e tjera të veriut, demokratët janë nisur në mënyrë të organizuar drejt Tiranës për t’iu bashkuar protestës kombëtare kundër qeverisë.
Degët e Partisë Demokratike në Shkodër, Malësi të Madhe, Vau-Dejës, Pukë dhe Fushë-Arrëz kanë organizuar nisjen e mbështetësve të tyre drejt kryeqytetit, nga vendet e përcaktuara paraprakisht.
Në prag të protestës, deputeti demokrat i Shkodrës, Kliti Hoti, është shprehur se pjesëmarrja në tubimin kundër qeverisë është një përgjegjësi qytetare.
“Sot, gjithë Shkodra, jo vetëm Partia Demokratike, është në mbështetje të studentëve. Siç e shihni, është një organizim i realizuar nga Partia Demokratike, por nuk janë vetëm anëtarë të Partisë Demokratike, është gjithë Shkodra, gjithë Shqipëria në mbështetje të studentëve, në mbështetje të gjithë idesë shqiptare që kësaj qeverie i ka ardhur fundi dhe ne duhet të japim atë kontributin tonë.
Sot edhe çdo ditë do të vazhdojmë derisa kjo qeveri të japë dorëheqjen, derisa ky parlament, që nuk është legjitim, që është kthyer në noter të kësaj qeverie, të japë dorëheqjen.
Ajo që kërkohet nga studentët, nga të gjithë shqiptarët, është një qeveri e tranzicionit dhe një Kod Zgjedhor që të përfaqësojë gjithë shqiptarët.
Nuk ka Partia Demokratike dhe studentë, Partia Demokratike, gjithë studentët, gjithë shqiptarët janë një kundër kësaj qeverie. Qëllimi i vetëm është rrëzimi i kësaj qeverie, rrëzimi i Edi Ramës, i cili po i çon shqiptarët në vëllavrasje”, ka deklaruar Hoti.
Demokratët e veriut pritet t’u bashkohen protestuesve të tjerë në Tiranë, në kuadër të tubimit kombëtar kundër qeverisë së kryeministrit Edi Rama.
Discussion about this post