“Sot në orën 2 te vendi”, kështu nis dita e të rinjve që prej 5 muajsh janë në shesh për të protestuar.
“Unë jam Iris Kola, studente për Arkitekturë dhe Planifikim Peizazhi, 20 vjeçe”, tha ajo.
Irisi thotë se la pas studimet për të marrë pjesë në tubime. Sipas saj, të rinjtë sot nuk protestojnë vetëm për përmirësimin e kushteve në auditore. Arsyet se përse ata dalin në shesh janë më të mëdha se kaq.
Protesta paqësore e flamingove, në tetor u shndërrua në një revoltë që solli përplasjen fizike ndërmjet studentëve dhe policisë. Irisi thotë se fjala u zëvendësua me veprime, pasi kërkesat e flamingove u shpërfillën nga politika.
“Protesta e qershorit ishte e flaktë, më pas u kthye në një qëndresë. Por protesta tani është më shumë një revoltë, sepse në 130 ditë protestë ne u bëmë edhe objekt talljeje për qeveritarët. Ndërsa tani nuk ka më fjalë, por vetëm veprime“, deklaroi Kola.
Në qershor qytetarët protestues kërkonin shfuqizimin e ligjeve që preknin natyrën, ndërsa tani kërkesa e tyre është një dhe e vetme: ata duan dorëheqjen e kryeministrit Edi Rama.
“Dorëheqje të kabinetit qeveritar. Ministria e Arsimit duhet të ishte e para që të dorëhiqej, pasi auditorët i ka bosh dhe studentët i ka të lyer me gjak”.
Studentët deri më tani nuk kanë prezantuar një lider që i përfaqëson, por, nga ana tjetër, më së miri ata dinë të organizohen, duke ndarë edhe detyrat mes tyre.
“Studentët protestojnë me zërin dhe forcën. Ne jemi të organizuar: dikush merret me mjekimin, dikush tjetër është te vija e parë e revoltës, dikush siguron gurët. Është e organizuar dhe ka ardhur krejtësisht organike”.
Për Irisin, fitorja e studentëve në Serbi është një mesazh që edhe në vendin tonë të rinjtë duhet të drejtohen drejt një lëvizjeje politike, që nesër zëri i tyre të mos vijë nga sheshi, por nga karriget e parlamentit.
“Studentët e fituan dhe është një lëvizje që edhe në Shqipëri duhet të fillojë për studentët dhe nga studentët, pa përfshirjen e politikës, OJF-ve apo OJQ-ve”.
E pas këtij lajmi, Iris Kola ka vetëm një mesazh. Të rezistojmë, sepse do t’ia dalim.
“Duket se ngjarja në Serbi ju ka dhënë shpresë edhe studentëve e popullit në Shqipëri. I kam parë që edhe këtu po organizohen në një lëvizje. Për mua klasa e vjetër duhet të zhduket, se për këtë arsye kemi protestuar me muaj. Duhet të ketë njerëz të ndershëm dhe profesionistë që punojnë pa interesa, për kombin”, tha Arvina Lleshi.
“Është diçka në krijim e sipër. Ne patjetër që do të punojmë për kauzën e përbashkët, padyshim që nuk do kemi protagonizëm. Mes vetes kemi edhe shumë pedagogë, intelektualë, mjek që nëse ata do të jenë dakord të na mbështesin edhe nga ana politike, patjetër që do të jemi të gatshëm që edhe ne t’iu japim suportin tonë që ndoshta nëse sheshi nuk na jep një zgjidhje përfundimtare, do duhet që Edi Rama t’i përballemi politikisht”, deklaroi Mateo Yskollari.
Edhe akademikët po ndajnë të njëjtën ide me studentët për një front të ri beteje me mazhorancën dhe opozitën: një rini që konkurron politikisht.
“Unë mendoj që është e domosdoshme një forcë politike studentore ku të ketë si dritën e diellit një bosht qëndror: klasa e vjetër duhet të përjashtohet. Në përbërje të saj duhet të ketë studentë, pedagogë, mësues, çdo njeri që ka duar të pastra dhe faqebardhë. Pjesa e ndyrë e partive të marksizëm-leninizimit duhet të pastrohet. Nuk e pastruan në vitin 1990, shiko ku jemi edhe pas 36 vitesh. Nëse nuk e pastrojmë edhe këtë herë, do i shtyhet Shqipërisë e ardhmja edhe për 100 vite të tjera dhe do jetë shpresë e humbur për të jetuar në këtë vend”, tha pedagogu Lush Susaj.
Megjithatë, ngërçi i të rinjve është Kodi Zgjedhor që favorizon dy partitë e mëdha me peshën kryesore në Parlament. Mateo Yskollari tregon për Top Channel studimin e mundësive se si kjo forcë e të rinjve do të prezantohet në vijim, me logon e një partie apo jo.
“Duke ditur që Kodi ynë Zgjedhor nuk të lë shumë hapësira siç mund të aplikohej në Serbi për shembull pjesa e listës studentore, ku në Shqipëri është e detyrueshme që të kemi një parti politike ose mund të zgjedhësh kandidatë të pavarur për deputetë, por që ndoshta mund të mos jetë zgjidhja më e mirë e duhur. Është diçka që duhet parë, padyshim që studentët janë duke punuar aktualisht me një lëvizje kombëtare studentore”.
Në rrjete sociale është krijuar profili i lëvizjes së re që po ngrihet ku kërkohet mobilizimi i strukturave studentore, me thirrjen për tu regjistruar përmes kartës së studentit. Ndërsa një tjetër grupim po mblidhet nën sloganin “rini nacionaliste”. Për profesorin Lush Susaj, bashkimi i studentëve në një forcë politike është vendimtare për vendin.
“Ajo që më shqetëson mua është vetëm fakti që duke qenë popull me pjekuri të ulët politike, një popull që i kemi vrarë e i kemi zhdukur elitat, e kemi mbetur në dorë të pseudoelitave; kam frikë se gjithë kjo dhunë, shantazh po e shtyn këtë cak që duhet ta kalojë shoqëria shqiptare”, deklaroi pedagogu Susaj.
Tashmë të rinjtë besojnë se ashtu siç studentët sfiduan Vuçiçin, me anë të një alternative politike në të njëjtën mënyrë do të mund të rrëzojnë Ramën.
Discussion about this post