Një shpërthim me lëndë plasëse ka tronditur orët e para të mëngjesit qytetin e Lezhës, ku persona ende të paidentifikuar kanë vendosur tritol në një automjet tip “Benz”, të parkuar në një garazh pranë zonës së “Mileniumit”.
Ngjarja është regjistruar rreth orës 01:50 dhe fatmirësisht nuk raportohet për persona të lënduar, ndërsa shpërthimi ka shkaktuar dëme materiale në automjet.
Sipas informacioneve paraprake, makina është në pronësi të Aleksandër Ndojës, një emër i njohur për Policinë, i cili rezulton të ketë precedentë të mëparshëm penalë.
Ndoja është përballur më herët me procedime për kundërshtim të punonjësve të Policisë, në vitin 2022, përndjekje dhe shkelje të masës së arrestit shtëpiak.
Deri më tani, mbeten të paqarta motivet e vendosjes së lëndës plasëse, ndërsa nuk ka ende një autor të identifikuar për këtë akt.
Grupi hetimor ka mbërritur në vendngjarje dhe po punon për mbledhjen e provave, dokumentimin e plotë të rrethanave dhe identifikimin e personave të përfshirë.
“Rreth orës 01:50, në një ambient parkimi (garazh), në afërsi të zonës së ‘Mileniumit’, në qytetin e Lezhës, dyshohet se ka shpërthyer lëndë plasëse në një automjet tip ‘Benz’, në pronësi të shtetasit A. N.
Nga shpërthimi nuk ka persona të lënduar. Grupi hetimor vijon veprimet për sqarimin e plotë të rrethanave të ngjarjes, si dhe për identifikimin dhe kapjen e autorit/autorëve.”
Hetimet vijojnë për të zbardhur nëse shpërthimi ka lidhje me konfliktet apo aktivitetin e mëparshëm të pronarit të automjetit.”, njoftoi policia.
Discussion about this post