Komisioni Qendror i Zgjedhjeve ka miratuar fletën tip për mbledhjen e nënshkrimeve për zhvillimin e një referendumi vendor në Tiranë, përmes të cilit synohet të mbrohet Parku Rinia nga ndërtimet e reja.
Nisma është ndërmarrë nga këshilltarët bashkiakë të opozitës në Tiranë, të cilët më 5 tetor iu drejtuan KQZ-së me një kërkesë për zhvillimin e referendumit, duke kundërshtuar projektin për ndërtimin e një kulle në këtë hapësirë publike.
Në mbledhjen e 15 tetorit, Komisioneri Shtetëror i Zgjedhjeve shqyrtoi kërkesat e dy grupeve nismëtare për zhvillimin e referendumeve vendore në Tiranë dhe Poliçan, duke vendosur miratimin e fletëve tip për mbledhjen e nënshkrimeve.
Në kërkesën e depozituar, nismëtarët argumentojnë se ndërtimi i një godine shumëkatëshe në Parkun Rinia do të shtojë trafikun, do të përkeqësojë cilësinë e ajrit dhe do të rrisë presionin njerëzor mbi hapësirat e gjelbra të kryeqytetit.
Kujtojmë se më 1 tetor, kryeministri Edi Rama prezantoi projektin fitues të konkursit ndërkombëtar për transformimin e kompleksit “Tajvani” në Parkun Rinia, duke bërë të ditur se studioja daneze Bjarke Ingels Group (BIG) ishte përzgjedhur për projektin “Tirana Fountain Plaza”. Projekti parashikon ndërtimin e një kulle rreth 78 metra të lartë, me apartamente, zyra dhe ambiente hotelerie, si dhe parkim nëntokësor. Rama e prezantoi ndërhyrjen si një tjetër etapë të vizionit të tij për Tiranën e vitit 2030, duke pretenduar se ndërtimi do të realizohet brenda perimetrit të pronës private dhe se do të shtojë hapësirat e gjelbra dhe elementët e ujit në park.
Discussion about this post