Partia Demokratike Evropiane ka reaguar ashpër ndaj dhunës, kërcënimeve dhe pengesave të raportuara ndaj gazetarëve që po mbulojnë protestat në Shqipëri, duke drejtuar kritika të forta edhe ndaj kryeministrit Edi Rama. Në një deklaratë publike, sekretari i përgjithshëm i kësaj partie, Sandro Gozi, kërkon hetime të pavarura për incidentet e denoncuara dhe përgjegjësi për personat që kanë ushtruar dhunë ndaj gazetarëve.
Sipas tij me rastet e dhunës dhe incidentst e publikuara së fundmi, Shqipëria rrezikon të largohet nga rruga e BE.
Partia i referohet të dhënave të publikuara nga Asociacioni i Gazetarëve të Shqipërisë (AGSH), si dhe një investigimi të BIRN, sipas të cilit që prej 13 tetorit janë regjistruar rreth 50 raste dhune dhe pengesash ndaj gazetarëve, 41 prej të cilave u atribuohen efektivëve të Policisë së Shtetit.
Edhe organizata “Reporterët pa Kufij” ka dokumentuar 28 raste dhune, intimidimi ose pengimi të punës së medias gjatë periudhës 13-19 tetor, që kanë prekur të paktën 23 profesionistë të medias. Sipas raportit, të paktën 12 gazetarë janë sulmuar fizikisht.
Reagimi
Partia Demokratike Evropiane shpreh shqetësim të thellë për raportimet mbi dhunën, kërcënimet dhe pengimin e gazetarëve që mbulojnë protestat në Shqipëri.
Asociacioni i Gazetarëve të Shqipërisë (AGSH) ka publikuar një listë të detajuar të incidenteve. Një investigim i BIRN, i publikuar më 3 nëntor, raporton rreth 50 raste që prej 13 tetorit, 41 prej të cilave u atribuohen efektivëve të Policisë së Shtetit. Ndërkohë, organizata “Reporterët pa Kufij” ka dokumentuar 28 raste dhune, intimidimi ose pengimi të punës së medias gjatë periudhës 13-19 tetor, që kanë prekur të paktën 23 profesionistë të medias, mes tyre të paktën 12 të sulmuar fizikisht.
Rastet e përshkruara nga BIRN janë veçanërisht shqetësuese. Gazetarja e Klan News, Glidona Daci, ka deklaruar se është spërkatur në fytyrë teksa raportonte drejtpërdrejt. Redaktori i Syri, Julian Hoxhaj, ka treguar se është goditur me shkelma dhe tërhequr zvarrë nga rreth një duzinë efektivësh policie. Ndërsa drejtuesi i Citizens.al, Lorin Kadiu, ka deklaruar se një plumb gome i ka kaluar pranë fytyrës dhe se autoboti i ujit i ka dëmtuar pajisjet e punës.
“Rrëfimet e gazetarëve që janë goditur, shtyrë, spërkatur apo penguar të punojnë duhet të merren seriozisht. Gazetarët duhet të jenë në gjendje të raportojnë lirshëm dhe në mënyrë të sigurt, veçanërisht kur dokumentojnë veprimet e autoriteteve. Këto akuza kërkojnë hetime të menjëhershme, të paanshme dhe të pavarura, me ruajtjen e të gjitha pamjeve filmike dhe vënien para përgjegjësisë të personave përgjegjës”, deklaroi Sandro Gozi, sekretar i përgjithshëm i Partisë Demokratike Evropiane. Edhe Komiteti për Mbrojtjen e Gazetarëve dhe organizatat partnere kanë bërë thirrje për hetimin e rasteve të dhunës. Tre punonjës të medias kanë pasur nevojë për trajtim spitalor pas incidenteve të 13 tetorit. Në monitorimin e veçantë të protestës së 20 tetorit, edhe Avokati i Popullit ngriti shqetësime lidhur me pretendimet për dhunë policore, duke kërkuar ruajtjen e provave dhe përcaktimin e përgjegjësive. Gozi i drejtoi gjithashtu një mesazh të drejtpërdrejtë kryeministrit Edi Rama, duke i kërkuar të ndalojë intimidimin dhe diskreditimin e mediave për raportimin e tyre.
“Kryeministri Edi Rama duhet të ndalojë intimidimin apo diskreditimin e mediave për pasqyrimin që i bëjnë ngjarjeve. Kur gazetarët përballen me dhunë gjatë kryerjes së detyrës dhe kryeministri sulmon organizatat mediatike, Shqipëria largohet edhe më shumë nga rruga evropiane që thotë se dëshiron të ndjekë. Respektimi i lirisë së shtypit, llogaridhënia dhe shteti i së drejtës duhet të dëshmohen në praktikë, jo vetëm të premtohen gjatë procesit të anëtarësimit në BE”, theksoi Gozi. Partia Demokratike Evropiane u bën thirrje autoriteteve shqiptare të garantojnë sigurinë e gazetarëve që mbulojnë protestat publike dhe të sigurojnë që çdo hetim për abuzimet e pretenduara të jetë i paanshëm dhe i pavarur.
Discussion about this post