Presidenti i Republikës Ilir Meta ka reaguar pas vendimit të Kushtetueses për të shtyrë seancën e shkarkimit për ditën e hënë. Meta premton se do t’u lexojë qytetarëve shqiptarë të gjitha përgjigjet e pyetjeve që Gjykata Kushtetuese i dërgoi sot në seancën e shqyrtimit të shkarkimit të tij ose jo.
Në një postim në Facebook, kreu i shtetit theksoi se do t’i kthejë të gjitha përgjigjet e 72 pyetjeve brenda afatit të premtuar të 48 orëve. Ndër të tjera, Meta falenderoi të gjithë këshilltarët e tij ligjorë për mbrojtjen e çështjes në institucionin më të lartë të drejtësisë në vendin tonë.
“Falenderoj këshilltarët e mi për punën e shkëlqyer, që kanë bërë gjatë farsës gjyqësore të iniciuar nga ish-Kuvendi monist dhe antikushtetues. Pasi u njoha me 72 pyetjet e anëtarëve të Gjykatës Kushtetuese, brenda 48 orëve jo vetëm do të dorëzojmë 72 përgjigjet, por personalisht si President i Republikës do ua lexoj të gjithë qytetarëve të Republikës përgjigjen për çdo pyetje, nga Institucioni i Kryetarit të Shtetit”, shkuan Meta.
Seanca e shkarkimit që u zhvillua sot, u shty pasi këshilltari ligjor i Presidencës, Bledar Dervishaj kërkoi afat 48 orë për t’u konsultuar me Metën për realizimin e të gjitha përgjigjeve për pyetjet e drejtuara.
Discussion about this post