E kthyer tashmë në një metodë të zakonshme, Bashkinë e Tiranës vazhdon pothuajse në çdo procedurë publike që të mos respektojë parimin e konkurrencës. E njëjta gjë ka ndodhur edhe në tenderin e hapur në datën 31 dhjetor 2021, i cili mban numrin e referencës REF-16777-12-30-2021. Por, çudia në këtë procedurë nis që nga qëllimi për të cilin është hapur, ku Bashkia e Tiranës synon ngritjen e një platforme për mbledhjen dhe analizimin e të dhënave në funksion të një vendimmarrje sa më efikase në institucion. Pra, e thënë me fjalë më të thjeshta, me aq sa kuptohet, Erion Veliajt nuk i mjaftojnë 20 këshilltarët që i dolën në skandalin e pagave për të marrë vendime efikase, tani i duhet dhe një platformë për ta ndihmuar në vendimet që do të marrë.
Përpos absurditetit për të cilin është hapur tenderi, institucioni që Veliaj drejton nuk respekton edhe procedurat e rregullta të prokurimit. Ky tender ka fondin limit prej 29.143.328 lekë të reja, ose rreth 291 milionë lekë të vjetra dhe në të kanë marrë pjesë vetëm dy kompani, “3i-Solutions” sh.p.k dhe “INET ALBANIA” sh.p.k.
Shoqëria “3i-Solutions” sh.p.k është skualifikuar nga gara dhe kështu procedura është zhvilluar me vetëm një konkurrent, pra vetëm me “INET ALBANIA” sh.p.k., e cila më pas është shpallur automatikisht fituese.
Arsyen e vërtetë e kupton kur hap dokumentet specifike të tenderit, ku shihet që është skualifikuar kompania që ka paraqitur ofertën më të vogël. Shoqëria “3i-Solutions” sh.p.k ka paraqitur ofertën prej 24.840.000 lekë të reja, ose rreth 250 milionë lekë të vjetra. Ndërsa kompania “INET ALBANIA” sh.p.k. ka paraqitur ofertën prej 27.686.000 lekë të reja ose rreth 280 milionë lekë të vjetra, e cila është shpallur më pas fituese.
Kështu, Bashkia e Tiranës ka skualifikuar kompaninë që këtë punë do ta bënte me rreth 30 milionë lekë të vjetra më pak se kompania që është shpallur fituese.
Duke qenë se kjo metodë prokurimi paraqet risk dhe hedh dyshime se fituesi mund të jetë i paracaktuar, “Open Data” e ka futur në kategorinë e flamurit të kuq, me mbishkrimin e skualifikimit të të gjithë operatorëve ekonomik përveç fituesit.
Ky tender është një nga çudirat e radhës të Lali Erit që edhe disa miliona nga taksat e qytetarëve, t’i çojë për punë që nuk kanë asnjë të mirë publike. Nëse bëjmë një llogari të thjesht, Veliaj harxhon miliona lekë vetëm për të marrë vendime. Kjo pasi 20 këshilltarët që paguan për ta ndihmuar në vendimmarrje, u kushtojnë taksave të qytetarëve rreth 200 mijë euro në vit. Tani kësaj shifre do t’i shtohen edhe 291 milionë lekë për platformën që pritet të ngrejë.
Tragjikomikja në këtë situatë qëndron në faktin që, qytetarët e Tiranës do të paguajnë miliona lekë që Erion Veliaj të marrë vendime për shkatërrimin e shtëpive të tyre duke i lënë në rrugë pa zgjidhje, që të japë leje ndërtimi për kulla në çdo cep të Tiranës, për ngushtimin e rrugëve duke favorizuar trafikun në Tiranë, për menaxhimin e mbetjeve me afera korruptive, për prishjen e godinave historike të qytetit, për ngritjen e çmimit të biletës së urbanit pa bërë asnjë investim në përmirësimin e tij, për t’i lënë pa ujë me orë të tëra qytetarët e Tiranës dhe për t’ua bërë jetesën më të shtrenjtë, etj.
X.S/ Gijotina.com
Discussion about this post