Bashkia e Delvinës gjatë kësaj periudhe po kryen një sërë investimesh në funksion të turizmit pasi e shikon këtë si një sektor me perspektivë për zhvillimin ekonomiko-social të zonës. Falë bukurive natyrore dhe monumenteve kulturorë që ka Delvina dhe zonat e saj rurale, mund të shndërrohen në një atraksion turistik që çdo vizitor do të ketë dëshirë t’i vizitojë. Sipas kryetares së kësaj bashkie Majlinda Qilimi pritet që këtë vit Delvina të frekuentohet nga një numër i konsiderueshëm vizitorësh falë investimeve që janë bërë dhe që do të bëhen.
“Në Delvinë unë përmenda muzeun, muzeu do t’i shërbejë të ardhmes dhe padyshim do të jetë një pikë referimi për turistët. Ne kemi mjaft monumente natyrorë dhe kulturorë të cilët padyshim që vlejnë për tërheqjen e vizitorëve. Janë atraksione tursitike të patjetërsueshme, janë asete turistike me vlerë që ne kemi në qytetin tonë. Unë ju përmenda pak më herët Kalasën edhe aty kemi monumente kulturore dhe natyrore që ajo rrugë ua mundëson turistëve të shkojnë dhe ti vizitojnë. Po ashtu në qytetin e Delvinës kemi kompleksin islamik. Është ndër komplekset më të vjetër në qytetin e Delvinës, është shndërruar dhe vazhdon të shndërrohet në një pikë turistike që tërheq herë pas here vizitorë. Po në Rusan, kemi xhaminë e Gjin-Aleksit rikonstruksioni i së cilës ka përfunduar dhe është vërtet një mrekulli për këdo që shkon dhe e viziton këtë objekt kulti . Kemi shumë e shumë të tjera që mund të shndërrohen në atraksione tursitike. Ne do të kërkojmë nga pushteti qëndror investime për rrugët lidhëse të fshatrave me qytetin pasi vetëm në këtë mënyrë do të mund ti shërbejmë turizmit. Kemi manastirin e Kamenas edhe aty nëse do të realizohet rruga, do të kemi një tërheqje të turizmit”, shprehet Qilimi
Zonat rurale dhe turizmi malor janë ndër format më të pëlqyera nga vizitorët e huaj për të kaluar pushimet në Shqipëri .
