Komisioni i Prokurimit Publik ka anuluar tenderin e Bashkisë Shkodër me vlerë 4.2 miliardë lekë për pastrimin e mbetjeve në zonën qendrore të këtij qyteti. Ky vendim erdhi pas ankesës që bëri kompania “ECO Empire Sh.p.k”, me arsyetimin se ishin modifikuar dokumentet e procedurës së prokurimit. Kujtojmë se bëhet fjalë për një tender të hapur nga Bashkia e drejtuar nga Voltana Ademi, me objekt “shërbim i pastrimit për bashkinë Shkodër zona qendrore”, i cili mban numrin e referencës REF-15078-12-14-2021 dhe ka fondin limit prej 422,632,380 lekë të reja, ose rreth 4.2 miliardë lekë të vjetra.
Kompania “ECO Empire Sh.p.k” e cila ka marrë pjesë në këtë procedurë, pasi ka parë kriteret e përcaktimit të fondit, ka konstatuar që është kryer në mënyrë jo të rregullt. Për këtë, shoqëria i është drejtuar me një ankesë Komisionot të Prokurimeve Publike, e cila arsyetonte se duhej rishikuar vlera e tenderit si dhe duhej kryer akt-ekspertimi i përllogaritjes së fondit limit, pasi sipas saj, binte ndesh me VKM-në nr.319 datë 31.05.2018, që ka të bëjë me masat e përcaktimit të kostove të menaxhimit të mbetjeve.
KPP e ka marrë në shqyrtim ankesën dhe ka ngarkuar një ekspert të fushës i cili ka bërë përllogaritjen e fondit limit për shërbimin e pastrimit. Në gjetjet që ka bërë eksperti, rezulton se vlera totale e pastrimit të Bashkisë Shkodër zona qendrore, shkon në 160.746.088 lekë të reja, ose rreth 1.6 miliardë lekë të vjetra. Pra, shuma stratosferike që ka vendosur Bashkia e Shkodrës në këtë tender, është 2.6 miliardë lekë të vjetra më shumë nga ç’duhej të ishte në të vërtetë. Bazuar në ekspertizën e gjetjeve të ekspertit, Komisioni i Prokurimeve Publike ka vendosur anulimin e procedurës së mësipërme të prokurimit.
Siç duket kësaj radhe nuk i eci kryetares në largim të Bashkisë Shkodër, Voltana Ademi. Duke e ditur që nuk do të jetë më në krye të kësaj bashkie, Ademi kishte menduar që të gllabëronte një dorë të mirë dhe të fundit nga taksat e qytetarëve nëpërmjet këtij tenderi. Ky është një fakt tjetër që i shtohet pakënaqësive të qytetarëve të Shkodrës ndaj kryebashkiakes, që është kritikuar jo pak herë për keqmenaxhimin që i ka bërë kryeqendrës së veriut të Shqipërisë.
X.S/Gijotina.com
Discussion about this post