Partia Demokratike ka reaguar në lidhje me arrestimin e ish-gjeneralit të Guardia di Finanza në Itali dhe lidhjet e tij me këshilltarin e kryeministrit Edi Rama, Ëngjëll Agaçin.
Deputeti Ervin Salianji u shpreh se arrestimi i Fabrizio Lisit po nxjerr fijet që lidhin Ramën me operacionin kriminal të kanabizimit të Shqipërisë. Sipas Salianjit investigimet e medias italiane dhe shqiptare, tregojnë lidhjet e mikut italian të Ramës dhe njeriut më të afërt të tij, Ëngjëll Agaçit.
“Investigimet e medias italiane dhe shqiptare, tregojnë se miku italian i Ramës dhe njeriut të tij të më të afërt, Ëngjëll Agaçit, është personi që në kulmin e kanabizimit servirte raporte për asgjesimin e 99 përqind të drogës në Shqipëri. Raporte të cilat më pas trumbetoheshin nga qeveria si suksese duke mashtruar për qëllime kriminale shqiptarët dhe partnerët ndërkombëtarë. Arrestimi i Fabrizio Lisit dhe dalja në pah e lidhjeve të tij me njeriun më të afërt të Ramës, është prova se kthimi i vendit tonë në një Kolumbi, është bërë nga ata që kanë pushtetin politik, qeverisës dhe ekonomik, kriminal dhe që janë të zotë të korruptojnë e të fusin në thes edhe drejtues të lartë të Guardia di Financa-s italiane. Çuarja para drejtësisë e njeriut që nën gradat e gjeneralit, ishte vënë nën shërbim të mafias së Kanabisit në Shqipëri, duhet të jetë pikënisja e një operacioni hetimi që do të çojë tek Edi Rama. Investigimi i mediave ka nxjerrë në pah se gjenerali Fabrizio Lisi ishte mik i ngushtë me një avokat shqiptar që quhej Ëngjëll Agaçi”, tha Salianji.
Ndër të tjera, deputeti demokrat shkruan se si shpërblim, atij i janë dhuruar disa toka në Vlorë, për të cilat kanë shkruar dhe televizionet italiane.
“Televizioni italian “RAI 3” publikoi një seri kronikash mbi trafikun e drogës nga Shqipëria. Në njërën prej tyre, flitej pikërisht për gjeneralin italian të Guardia Di Finanza, Fabrizio Lisi, i cili pas daljes në pension, drejtonte një shoqate kulturore italiane. Shoqatës i ishin dhuruar mijëra metra katrorë tokë në bregdetin e Vlorës. Sipas gazetarit të “RAI 3”, Valerio Kataldi prona në Vlorë i ishte dhuruar nga një person i hetuar në Itali për lidhjet mes Sacra Corona Unita dhe investimet e saj në Shqipëri. Lidhjet e Agacit me gjeneralin e korruptuar italian, tashmë i arrestuar, janë provë se vetëm një njeri me pushtet absolut pranë Edi Ramës, mund të ndërmerrte një operacion të tillë dhe se Saimir Tahiri, ministri i dënuar për bashkëpunim me bandën e Habilajve, ishte vetëm zbatuesi i këtij operacioni”, shtoi ndër të tjera.
Gjithashtu, Salianji i bëri thirrje SPAK që të çojë para drejtësisë përgjegjësit e vërtetë të kanabizimit të Shqipërisë.
Discussion about this post