Partia Demokratike ka akuzuar kryeministrin Edi Rama se ka angazhuar Tom Doshin dhe Vangjush Dakon për fushatën elektorale të 6 marsit.
Deputeti i PD Ervin Salianji tha në një dalje për mediat se edhe pse të shpallur non grata nga SHBA, Rama e ka emëruar Tom Doshin si drejtues politik dhe shef të fushatës së kandidates së PS në Shkodër, ndërsa të njëjtën gjë ka bërë dhe me Vangjush Dakon në Durrës.
“Edhe pse i shpallur non grata nga SHBA, Edi Rama e ka emëruar Tom Doshin si drejtues politik dhe shef të fushatës së kandidates së PS në Shkodër. Edi Rama bëri sikur e largoi Tom Doshin pas shpalljes non grata, po çdo shqiptar e di, e më shumë se kushdo tjetër socialistët shkodranë, e dinë se pa miratimin e Tom Doshit asnjë vendim nuk merret në Shkodër. Krahas Tom Doshit në Shkodër, Edi Rama ka aktivizuar edhe Vangjush Dakon në Durrës. Çdo durrsak e di që kandidatja është vegla e Dakos. Socialistëve durrsakë ua zgjedh kandidaten një tjetër non grata nga SHBA”, u shpreh Salianji.
Sipas deputetit demokrat, Rama ua ka dorëzuar pushtetin atyre në këmbim të shit blerjes së votave, pasi sipas tij nuk duan që Shqipëria të ndryshojë.
Discussion about this post