Policia e Vlorës ka vënë në pranga një 23-vjeçar si autorin e dyshuar të vrasjes së ish-ushtarakut Altin Alikaj në Vlorë. Sipas njoftimit zyrtar në pranga ka rënë Shazi Ahmetaj si autori i dyshuar dhe Mateo Kiptiku, 30 vjeç pasi dyshohet se ka ndihmuar autorin.
Në momentin e ndalimit Ahmetajt iu gjet dhe iu sekuestrua në cilësinë e provës materiale 40.5 gram lëndë narkotike e dyshuar e llojit heroinë, ndërsa ishte me precedent të mëparshëm kriminal në fushën e narkotikëve dhe të vjedhjes.
Ndërsa Kiptiku dyshohet se ka ndihmuar autorin për t’u fshehur, duke i siguruar një mjet të marrë me qira për lëvizjen e tij.
Ngjara e rëndë ndodhi në 19.02.2022, në lagjen 24 Maji, Vlorë ku viktima u gjet i pajetë në banesën e tij, ndërsa ishte dhunuar dhe me pas qëlluar me armë. Ai ishte shpallur i humbur më datë 11 shkurt nga kushëriri i tij në policinë e Vlorës. Sipas burimeve dyshohet se viktima gjithashtu ishte përdorues i lëndëve narkotike dhe se emri i tij ishte i njohur nga policia si përdorues droge, ndërsa nuk dihen ende arsyet që i morën jetën.
Discussion about this post