Ditën e nesërme në orën 10:00 pritet të zhvillohet mbledhja e Asamblesë së Federatës Shqiptare të Futbollit. FSHF bën me dije që mbledhja do të transmetohet live në kanalin e FSHF në Youtube nga ku mund ta ndiqni dhe të merrni sinjalin.
Kujtojmë se Komiteti Ekzekutiv i Federatës Shqiptare të Futbollit ka vendosur thirrjen e Asamblesë së Përgjithshme Zgjedhore më datë 2 mars 2022, me një rend dite siç e parashikon Statuti i FSHF-së: miratimin e bilancit financiar, miratimin e buxhetit, miratimin e raporteve të auditorëve të pavarur dhe zgjedhjet për organet drejtuese, për President dhe anëtar të Komitetit Ekzekutiv për katër vitet e ardhshme.
Gjithashtu për shkak të situatës së krijuar për shkak të ndërhyrjes politike në zgjedhjet e FSHF-së, Presidenti Armando Duka, i është drejtuar me një kërkesë Asamblesë së Përgjithshme Zgjedhore për shtyrjen e datës së zgjedhjeve, vendim i cili do të merret ditën e nesërme nëse do shtyhet apo jo. Duka është shprehur se kjo kërkesë do t’i shërbej një procesit të rregullt statutor dhe gjithë kandidatëve për të shpalosur platformat e tyre përballë komunitetit të futbollit.
Kujtojmë se situata për zgjedhjen e kryetarit të ri të FSHF-së nuk ka qenë e qetë për shkak të ndërhyrjes së politikës dhe konkretisht të kryebashkiakut të Tiranës, Erion Veliaj. Pasi dështoi me çdo metodë të presionit politik për të përjashtuar Armando Dukën nga gara, Veliaj tashmë po përdor Gjykatën e Tiranës për të arritur këtë qëllim. Deri më tani kjo gjykatë ka vepruar në mënyrë aktive dhe në sinkron me qëndrimet që ka mbajtur kreu i Bashkisë së Tiranës.
Discussion about this post