Gjykata ka lënë në burg agjentin e Krimeve në Drejtorinë Vendore të Policisë së Dibrës Arbër Sulajn, i cili u vetëdorëzua 2 ditë më parë në polici për vrasjen e Jurgen Dukës në datën 14 dhjetor 2021 në ambientet e një marketi.
Sula ishte në arrati që prej 14 dhjetorit të vitit të shkuar, ku pas një konflikti të çastit qëlloi me armën e shërbimit mbi Jurgen Dukën duke e lënë të vdekur në vend.
Përgjatë dy muaj e gjysmë në arrati, Arbër Sula është fshehur brenda territorit të vendit dhe nuk ka tentuar të largohet jashtë. Më herët gjatë kësaj kohe, nuk ka pasur tentativa komunikimi për ta bindur të dorëzohet pasi nuk dihej lokacioni.
Shkak i krimit u bë një zënkë për radhën në një supermarket në rrugën ‘Irafan Tomini’ në Tiranë. Në një moment, kur autori i dyshuar i ngjarjes ishte në radhë duke pritur që të paguante për çfarë kishte blerë, aty i futet Jurgen Duka dhe një tjetër person duke vendosur disa birra në banak me qëllim kalimin e tyre në kasë.
Në këtë moment ka reaguar autori i dyshuar i ngjarjes, i cili i ka kërkuar llogari Dukës dhe shokut të tij për veprimin e bërë. Në këtë moment nis edhe një përplasje e shkurtër fizike, pas të cilës autori i dyshuar i ngjarjes nxjerr armën nga çanta që mbante me vetë duke qëlluar në drejtim të dy të rinjve.
Discussion about this post