Vëllai i këngëtares së njohur Shyhrete Behluli, Maliqi ka shprehur vullnetin që t’i bashkohet ushtrisë ukrainase përballë pushtimit rus që vazhdon prej 14-ditësh, shkruajnë mediat në Kosovë.
Maliqi ka deklaruar se arsyet që e kanë shtyrë që të marrë një vendim kaq të rëndësishëm, janë thjesht humane.
Pasi ka parë pamjet që vijnë nga lufta, por edhe shpresa se pas kësaj lufte Ukraina mund ta përkrahë Kosovën si shtet duke qenë se i bashkon i njëjti fat, ai ka vendosur që t’i bashkohet ushtrisë ukrainase.
“Quhem Maliq Behluli. Arsyet janë thjesht humane. Na kanë prekur këto pamje. Një armik i përbashkët. Krejt shtetet europiane e kanë përkrahur këtë luftë. Ashtu duam të solidarizohemi. Duke qenë se dihet arsyeja politike. Ndoshta dhe Ukraina do të lëvizë dhe do të na përkrahë si shtet”, u shpreh ai.
Pyetur nëse ka apo jo përvojë luftarake, ai thotë se ka qenë pjesë e shërbimit ushtarak, ndërsa shton se këto pamje që shohin sot në Ukrainë i kujtojnë luftën në Kosovë para disa vitesh.
“Unë gjatë luftës së Kosovës kam qëndruar aty. Përvojën e shërbimit ushtarak e kam. Këto pamje na kujtojmë se çfarë kemi hequr ne në Kosovë”, tha Maliq Behluli.
Discussion about this post