Deputetët e Partisë Demokratike kanë në plan të shkarkojnë kryedemokratin Lulzim Basha i cili këmbëngul të mos japë dorëheqjen pas humbjes së thellë të PD-së në zgjedhjet e pjesshme lokale që u zhvilluan në 6 mars.
Burime bëjnë me dije se procesi i shkarkimit të Bashës nga posti, është nisur nga deputeti Tomor Alizoti.
Dokumenti për mbledhjen e firmave të nevojshme, po kalon duart e deputetëve të cilët ditë më parë në mbledhjen e grupit parlamentar pas humbjes së zgjedhjeve të 6 marsit, i kanë kërkuar Bashës të merrte përgjegjësi dhe të jepte dorëheqjen nga posti.
Por Ervin Salianji dhe Grida Duma kanë shkuar edhe më tej, duke hedhur idenë e firmosjes për përjashtimin nga grupi parlamentar të kreut të PD, megjithatë, përjashtimi duket ende një dëshirë e izoluar mes deputetëve të zhgënjyer.
Zërat mes grupit parlamentar që kanë kërkuar dorëheqjen e Bashës pas humbjes së zgjedhjeve të 6 marsit janë shtuar, ndërsa të paktën 20 prej tyre janë shprehur publikisht. I pari që i kërkojë të heqë dorë nga drejtimi i selisë blu ishte deputeti i Durrësit Ferdinand Xhaferraj ndërsa ligjvënësi demokrat i Shkodrës Helidon Bushati kërkoi një kuvend bashkimi mes demokratësh. Përballë këtyre kritikëve, Basha ka në krah një pjesë të vogël të deputetëve, krerët e degëve por edhe kandidatët e 6 marsit. Një ditë më parë ai pranoi humbjen, por tha se marrja e përgjegjësive do të bëhet pasi një procesi analize.
Discussion about this post